అంబరాన్నంటిన ఆదివాసీ సంబరం

మాట్లాడుతున్న పీవో అంకిత్‌, చిత్రంలో గిరిజన నాయకులు

ఏటూరునాగారం, న్యూస్‌టుడే: ఐటీడీఏ ఆధ్వర్యంలో మంగళవారం ప్రపంచ ఆదివాసీ దినోత్సవాన్ని అధికారికంగా ఘనంగా నిర్వహించారు. ఆదివాసీలు, వివిధ ఆదివాసీ ప్రజా సంఘాల ప్రతినిధులు పెద్ద సంఖ్యలో వైజంక్షన్‌ నుంచి బయలుదేరి నాయకపోడుల ఆరాధ్య దైవాలైన లక్ష్మీదేవరతో, మేళ తాళాలతో ఆదివాసీ సంప్రదాయ నృత్యాలతో ఐటీడీఏ కార్యాలయం వరకు ర్యాలీ నిర్వహించారు. ముఖ్య అతిథిగా ఐటీడీఏ పీవో అంకిత్‌ హాజరయ్యారు. పీసా కోఆర్డినేటర్‌ కొమరం ప్రభాకర్‌ అధ్యక్షతన కుమురం భీం విగ్రహానికి పూల మాలలు వేసి నివాళులర్పించారు. ఆదివాసీల జెండాను తుడుందెబ్బ రాష్ట్ర అధ్యక్షుడు వట్టం ఉపేందర్‌ ఆవిష్కరించారు. ఈ సందర్భంగా ఆదివాసీ ప్రజా సంఘాల ప్రతినిధి పొడెం రత్నం మాట్లాడుతూ.. రాజ్యాంగం కల్పించిన హక్కులు, చట్టాలు అమలయ్యేలా సంబంధిత శాఖల అధికారులతో సమన్వయ సమావేశం ఏర్పాటు చేయాలన్నారు. పోడు భూములపై అటవీ అధికారుల దాడులు ఆపాలన్నారు. సర్పంచి రామ్మూర్తి, ఏపీవో వసంతరావు, వివిధ సంఘాల నాయకులు కృష్ణప్రసాద్‌, రాంబాబు, ధర్మయ్య, రవి, సంతోష్‌, రవి, ఆరజు, మహేష్‌, నర్సయ్య, లక్ష్మీకాంత, సులోచన, చంద్రకళ, కోటయ్య, సారయ్య తదితర రెండు వందల మంది పాల్గొన్నారు.