Telangana News: మెదక్‌లో ఆర్టీసీ అద్దె బస్సు చోరీ.. బాచుపల్లిలో ప్రత్యక్షం

అగంతుకుడు వదిలేసిన బస్సు

మెదక్‌, న్యూస్‌టుడే: గుర్తుతెలియని వ్యక్తి ఆర్టీసీ అద్దె బస్సును చోరీ చేయగా.. 24 గంటల తర్వాత హైదరాబాద్‌లోని బాచుపల్లి సమీపంలో ప్రత్యక్షమైంది. బస్సు డ్రైవర్‌ తెలిపిన వివరాలు.. టీఎస్‌ 36టీ 7364 నెంబరు గల బస్సును ఆర్టీసీ అద్దె ప్రాతిపదికన మెదక్‌-హైదరాబాద్‌ వయా నర్సాపూర్‌ మార్గంలో నడుపుతోంది. ఈ క్రమంలో వాహనం డ్రైవరు కన్నెబోయిన దుర్గారాములు మంగళవారం రాత్రి బస్సును స్థానిక వాణిజ్యపన్నుల శాఖ కార్యాలయం పక్కన ఉన్న ప్రైవేటు బస్సులు నిలిపే స్థలంలో పార్కింగ్‌ చేశాడు. మరో డ్రైవరు సత్యనారాయణ అదే రోజు రాత్రి 12 గంటల వరకు బస్సుకు మరమ్మతులు చేసి నిద్రకు ఉపక్రమించారు. బుధవారం ఉదయం దుర్గారాములు వచ్చి చూసే సరికి బస్సు కనిపించకపోవడంతో పట్టణ ఠాణాలో ఫిర్యాదు చేయగా, ఈ మేరకు పట్టణ సీఐ మధు కేసు నమోదు చేసి విచారణ చేపట్టారు. ఈ క్రమంలో గురువారం ఉదయం హైదరాబాద్‌లోని బాచుపల్లి-మల్లంపేట మార్గంలో రహదారి పక్కన బస్సు కనిపించింది. దీన్ని గుర్తించిన వారు ఇక్కడి డ్రైవర్లకు సమాచారం అందించారు. ఈ మేరకు బాచుపల్లికి వెళ్లి బస్సును మెదక్‌కు తీసుకొచ్చారు.