ఈనాడు డిజిటల్‌, అమరావతి: ఎన్నికల ఫలితాలను చూసి సీఎం జగన్‌ షాక్‌ అవుతారని మాజీ మంత్రి దేవినేని ఉమామహేశ్వరరావు జోస్యం చెప్పారు. ఓడిపోతారని తెలిసి పార్టీ నాయకులతో మాట్లాడే ధైర్యం లేక..  గెలుస్తున్నామని ఐప్యాక్‌ సంస్థ ప్రతినిధులకు చెబుతున్నారని ఎద్దేవా చేశారు. మంగళగిరిలోని పార్టీ కేంద్ర కార్యాలయంలో గురువారం ఆయన విలేకరులతో మాట్లాడారు. ‘జగన్‌ మాటలు నమ్మడానికి ప్రజలెవరూ సిద్ధంగా లేరు. జగన్‌ ఏం చేశారని ఆయన్ని గెలిపిస్తారు? గెలవలేమని తెలిసే సిట్‌ అధిపతి రఘురామిరెడ్డి తప్పుడు పత్రాలను దహనం చేయించారు. నేడు కీలక ఈ ఫైల్‌్్స మాయం చేసేందుకు ప్రయత్నిస్తున్నారు. జగన్‌ మాటలు నమ్మి అధికార దుర్వినియోగానికి పాల్పడే అధికారులు భవిష్యత్తులో తగిన మూల్యం చెల్లించుకుంటారు. తప్పుచేసిన వారు జైళ్లకు వెళ్లడం ఖాయం’ అని హెచ్చరించారు.