14 రోజులు రిమాండు విధించిన న్యాయస్థానం

ఉరవకొండ, విడపనకల్లు, న్యూస్‌టుడే: పోలింగ్‌ తర్వాత రోజు అనంతపురం జిల్లా తాడిపత్రిలో జరిగిన అల్లర్ల ఘటనలో పోలీసులు 91 మందిని అరెస్టు చేశారు. గురువారం వారిని ఉరవకొండ న్యాయస్థానంలో హాజరుపర్చగా జడ్జి 14 రోజుల రిమాండు విధించారు. ఈనెల 14న తాడిపత్రి ఎమ్మెల్యే కేతిరెడ్డి పెద్దారెడ్డి తన అనుచరులతో కలిసి తెదేపా బీసీ నాయకుడు సూర్యముని ఇంటికి వెళ్లి ఆయన్ను దూషిస్తూ, దాడి చేశారు. ఈ ఘటనలో సూర్యముని అనుచరుడికి తీవ్ర గాయాలయ్యాయి. విషయం తెలుసుకున్న తెదేపా మాజీ ఎమ్మెల్యే జేసీ ప్రభాకర్‌రెడ్డి.. సూర్యముని ఇంటికి వెళ్లి పరామర్శించారు. తర్వాత అక్కడి నుంచి పోలీసు స్టేషన్‌ వరకు ర్యాలీ చేపట్టారు. ఈ క్రమంలో వైకాపా, తెదేపా వర్గాల మధ్య ఘర్షణ జరిగింది. రెండు వర్గాలు రాళ్లు రువ్వుకున్నాయి. తాడిపత్రి సీఐ మురళీకృష్ణతో పాటు కొందరు కానిస్టేబుళ్లకు గాయాలయ్యాయి. ఈ ఘటనలపై సీఐ ఫిర్యాదుతో 91 మందిపై కేసు నమోదు చేశారు. ఇందులో ఏ1గా ఎమ్మెల్యే కేతిరెడ్డి పెద్దారెడ్డి, ఏ2గా తెదేపా నాయకుడు సూర్యమునిని చేర్చారు. దీంతో తెదేపాకు చెందిన 53 మందిని, వైకాపాకు చెందిన 38 మందిని గురువారం అరెస్టు చేసి ఉరవకొండ ఫస్ట్‌క్లాస్‌ న్యాయస్థానంలో హాజరుపరిచారు. రిమాండ్‌ కింద నిందితులను రెడ్డిపల్లి జైలుకు తరలించారు.