Guntur: గుంటూరులో డయేరియా కలకలం.. ఒకరి మృతి

గుంటూరు: నగరంలో డయేరియా విజృంభించింది. శారదా కాలనీలో మున్సిపల్‌ నీళ్లు తాగి పలువురు తీవ్ర అస్వస్థతకు గురయ్యారు. వారిలో పద్మ అనే మహిళ మృతి చెందగా, మరో 10మంది జీజీహెచ్‌లో చికిత్స పొందుతున్నారు. బాధితులను కమిషనర్‌ చేకూరి కీర్తి, జనసేన, తెదేపా నాయకులు పరామర్శించారు. మూడు రోజుల క్రితం డయేరియాతో సంగడిగుంటకు చెందిన కొర్రపాటి ఓబులు మృతి చెందారు. గత కొన్ని రోజులుగా మున్సిపాలిటీ నుంచి కలుషిత నీరు సరఫరా అవుతోందని నగర వాసులు ఆరోపిస్తున్నారు.

పద్మ కుటుంబానికి న్యాయం చేయాలంటూ తెదేపా, జనసేన నాయకులు జీజీహెచ్‌ వద్ద ఆందోళనకు దిగారు. ఆసుపత్రి నుంచి మృతదేహాన్ని తరలించవద్దంటూ నిరసన చేపట్టారు. తాగునీరు సరిగా ఇవ్వలేని కమిషనర్‌ ఎందుకని ప్రశ్నించారు.