Ramadan: ఘనంగా రంజాన్‌ వేడుకలు.. భక్తిశ్రద్ధలతో ముస్లింల ప్రార్థనలు

హైదరాబాద్‌: తెలుగు రాష్ట్రాలతో పాటు దేశవ్యాప్తంగా రంజాన్‌ వేడుకలను ఘనంగా నిర్వహించారు. ముస్లింలు మసీదులకు వెళ్లి భక్తిశ్రద్ధలతో ప్రార్థనలు చేశారు. చిన్నాపెద్దలు పరస్పరం ఆలింగనం చేసుకుని పండగ శుభాకాంక్షలు తెలియజేసుకున్నారు. హైదరాబాద్‌లోని మీర్‌ ఆలం ఈద్గా, చార్మినార్‌, మక్కా మసీదులో ముస్లింలు ప్రత్యేక ప్రార్థనలు చేశారు.

తెలంగాణ సీఎం రేవంత్‌రెడ్డి.. రాష్ట్ర ప్రభుత్వ సలహాదారు షబ్బీర్‌ అలీ ఇంటికి వెళ్లి రంజాన్‌ శుభాకాంక్షలు తెలిపారు. సనత్‌నగర్‌లో వేడుకలకు భారాస ఎమ్మెల్యే తలసాని శ్రీనివాస్‌ యాదవ్‌ హాజరయ్యారు. ఆదిలాబాద్‌లో సామాన్యులతో కలిసి జిల్లా ఎస్పీ ఆలం ప్రార్థనలు చేశారు. దిల్లీలోని జామా మసీదు భక్తులతో కిటకిటలాడింది.