Bihar: వృద్ధుడి బ్యాంక్‌ ఖాతాలో ₹52 కోట్లు.. ‘బాబ్బాబు! అంతొద్దు గానీ కొంతైనా ఇవ్వండి ప్లీజ్‌’

పట్నా: బిహార్‌లో సాధారణ పౌరుల బ్యాంకు ఖాతాల్లో డబ్బు వెల్లువలా వచ్చి పడుతోంది. ఎక్కడి నుంచి ఈ సొమ్ము వస్తోందో తెలీదుగానీ రోజుకో ఘటన వెలుగు చూస్తోంది. ఇదే రాష్ట్రానికి చెందిన కటిహార్‌ జిల్లా బగౌరా పంచాయతీకి చెందిన ఇద్దరు విద్యార్థుల ఖాతాలో గురువారం ఏకంగా రూ.960 కోట్లు వెలుగుచూడడం ఆశ్చర్యం కలిగించింది. ఆ ఘటన మరువక ముందే ముజఫరాపూర్‌ జిల్లాకు చెందిన ఓ వృద్ధుడి పింఛన్‌ ఖాతాలో రూ.52 కోట్లు పడడం ఆశ్చర్యం కలిగించింది.

ముజఫరాపూర్‌ జిల్లా కతిహార్‌ పోలీస్‌స్టేషన్‌ పరిధిలోని ఓ గ్రామానికి చెందిన రైతు రామ్‌ బహుదూర్‌ షా పింఛన్‌ ఖాతాకు ఆధార్‌ కార్డు, వేలిముద్ర వెరిఫికేషన్‌ కోసం బ్యాంకుకు వెళ్లాడు. ఈ క్రమంలో ఖాతాలో ఎంతుందో చెక్‌ చేయాలని అక్కడి కస్టమర్‌ సర్వీస్‌ పాయింట్‌ (సీఎస్‌పీ) అధికారిని కోరగా.. ఖాతా చెక్‌ చేస్తే అందులో రూ.52 కోట్లు ఉన్నట్లు చూపించింది. అంతమొత్తం ఉండడం చూసి ఒక్కసారిగా షాక్‌కు గురయ్యానని, ఆ మొత్తం ఎక్కడి నుంచి వచ్చిందో తనకు తెలీదని బహుదూర్‌ షా చెప్పుకొచ్చాడు.

ఇదే తరహాలో పెద్ద మొత్తంలో ఖాతాల్లో డబ్బులు జమ అవుతున్న ఉదంతాలు వెలుగుచూసినప్పుడు ఆయా ఖాతాలను అధికారులు తాత్కాలికంగా నిలిపివేస్తున్నారు. డబ్బు ఉపసంహరించుకోకుండా చూస్తున్నారు. ఈ క్రమంలో తన ఖాతాలో పడిన సొమ్ములో ఎంతో కొంత తనకిస్తే బతికేస్తానని చెప్పుకొచ్చాడు రామ్‌ బహుదూర్‌ షా. ‘‘వ్యవసాయంపై ఆధారపడి కుటుంబాన్ని పోషించుకుంటున్నా. ప్రభుత్వం పెద్ద మనసు చేసుకుని ఆ ఖాతాలో కొంత సొమ్ము ఇప్పిస్తే నా జీవితం సాఫీగా సాగిపోతుంది’’ అని ప్రభుత్వానికి విజ్ఞప్తి చేశాడు. ఈ అంశంపై సంబంధిత అధికారులకు సమాచారం ఇచ్చినట్లు స్థానిక ఎస్సై తెలిపారు. అంతకుముందు బిహార్‌కే చెందిన ఓ వ్యక్తి ఖాతాలో ఇటీవల పొరపాటున రూ.5.5 లక్షలు జమవగా, తనకు ప్రధాని మోదీ ఇచ్చారంటూ వెనక్కి ఇచ్చేందుకు అతడు నిరాకరించడం గమనార్హం.