పంజాబ్‌ గోదాముల్లో సీబీఐ ఆకస్మిక తనిఖీలు

దిల్లీ: పంజాబ్‌, హరియాణాలోని దాదాపు 20 ఫుడ్‌ కార్పొరేషన్‌ ఆఫ్‌ ఇండియా(ఎఫ్‌సీఐ) గోదాముల్లో సీబీఐ ఆకస్మిక తనిఖీలు చేపట్టింది. గురువారం రాత్రి ప్రారంభమైన ఈ సోదాలు శుక్రవారం ఉదయం వరకు కొనసాగినట్లు సమాచారం. గోదాముల నిర్వహణలో అక్రమాలు చోటుచేసుకుంటున్నట్లు అందిన సమాచారం మేరకే తనిఖీలు నిర్వహించినట్లు అధికారులు తెలిపారు. ప్రజలతో నేరుగా లావాదేవీలు జరిగే ఇలాంటి ప్రదేశాల్లో అవినీతిని అరికట్టేందుకే ఈ సోదాలు జరిపినట్లు పేర్కొన్నారు. ఎఫ్‌సీఐ విజిలెన్స్‌ బృందాలు కూడా తనిఖీల్లో పాల్గొన్నట్లు వెల్లడించారు. కొత్త సాగు చట్టాలకు వ్యతిరేకంగా దిల్లీ సరిహద్దుల్లో జరుగుతున్న రైతుల ఆందోళనలు ఇటీవల తీవ్ర పరిణామాలకు దారితీసిన విషయం తెలిసిందే. ఈ నిరసన కార్యక్రమాల్లో అత్యధిక మంది పంజాబ్‌ నుంచి పాల్గొన్న విషయం తెలిసిందే. ఈ నేపథ్యంలో సీబీఐ సోదాలకు ప్రాధాన్యం ఏర్పడింది.

ఇవీ చదవండి...

రైతు ఉద్యమకారులపై ఉచ్చు

రైతుల సంక్షేమం కోసమే కొత్త చట్టాలు