ఆప్‌ సర్కార్‌ ‘ఇంటింటికీ రేషన్‌’కు మళ్లీ బ్రేక్‌

దిల్లీ: కేజ్రీవాల్‌ సర్కారు తలపెట్టిన ఇంటివద్దకే రేషన్‌ సరకుల కార్యక్రమానికి మరోసారి బ్రేక్‌ పడింది. 72 లక్షల మంది లబ్ధిదారులకు మేలు చేసే ఈ పథకానికి కేంద్ర ప్రభుత్వం అడ్డుపుల్ల వేసిందని ఆమ్‌ ఆద్మీ పార్టీ వర్గాలు వెల్లడించాయి. వాస్తవానికి మార్చిలోనే దీన్ని ప్రారంభించాల్సి ఉండగా కేంద్రం అడ్డుచెప్పడంతో అప్పట్లో నిలిచిపోయింది. ఇప్పుడూ అదే పరిస్థితి నెలకొంది. ఈ నేపథ్యంలో కేంద్రం వైఖరిపై ఆమ్‌ ఆద్మీ పార్టీ విరుచుకుపడింది. రేషన్‌ మాఫియాతో ఉన్న సంబంధాల కారణంగానే ప్రధాని మోదీ ఈ కార్యక్రమాన్ని అడ్డుకుంటున్నారని ట్విటర్‌లో విమర్శలు గుప్పించింది.

ఆప్‌ సర్కారు ‘ఇంటింటికీ రేషన్‌’ అందజేసే పథకాన్ని మార్చిలో కేంద్రం అడ్డుకుంది. ఈ స్కీమ్‌ వల్ల లబ్ధిదారులు ఆహారభద్రతా చట్టం నిర్ణయించిన ధరల కంటే, ప్యాకేజీ, హ్యాండ్లింగ్‌కు అదనపు చెల్లింపులు చేయాల్సి ఉంటుందని తెలిపింది. ఆప్‌ సర్కారు మాత్రం లబ్ధిదారులు రేషన్‌ దుకాణాలకు వెళ్లకుండానే సరకులు పొందడంతో పాటు, దీనిద్వారా అక్రమాలను అరికట్టవచ్చని చెబుతోంది. తొలుత ఈ పథకానికి ‘ముఖ్యమంత్రి ఘర్‌ ఘర్‌ రేషన్‌ యోజన’గా ఆప్‌ సర్కారు పేరు పెట్టింది. కానీ కేంద్రం అభ్యంతరం తెలుపడంతో ‘ముఖ్యమంత్రి’ పేరును తొలగించింది.