Arvind Kejriwal: కేజ్రీవాల్‌కు మరోసారి ఈడీ సమన్లు

దిల్లీ: దిల్లీ (Delhi) ముఖ్యమంత్రి అరవింద్ కేజ్రీవాల్‌ (Arvind Kejriwal)కు ఎన్‌ఫోర్స్‌మెంట్ డైరెక్టరేట్‌ (ED) అధికారులు వరుసగా రెండు సమన్లు జారీ చేశారు. దిల్లీ జల మండలిలో చోటుచేసుకున్న అవకతవకలకు సంబంధించిన కేసులో మార్చి 18న ఈడీ కేంద్ర కార్యాలయంలో విచారణకు హాజరుకావాలని అందులో పేర్కొన్నారు. అంతకముందు శనివారం సాయంత్రం దిల్లీ మద్యం పాలసీ కేసులో మనీలాండరింగ్‌కు సంబంధించి మార్చి 21న విచారణకు హజరుకావాలని తొమ్మిదోసారి సమన్లు జారీ చేశారు. గతంలో ఇదే కేసులో జారీ చేసిన వాటికి ఆయన స్పందించకపోవడంతో దిల్లీ కోర్టులో ఈడీ రెండు ఫిర్యాదులు నమోదు చేసింది. దీనిపై శనివారం విచారణ సందర్భంగా కేజ్రీవాల్‌ కోర్టు ముందు హాజరయ్యారు. చీఫ్‌ మెట్రోపాలిటన్ మేజిస్ట్రేట్‌ ఆయనకు బెయిల్‌ మంజూరు చేశారు. అదే రోజే సాయంత్రం, మరుసటి రోజు ఆయనకు సమన్లు జారీ చేయడంపై ఆప్‌ వర్గాలు కేంద్రంపై విమర్శలు చేస్తున్నారు. 

దిల్లీ జలమండలికి సంబంధించిన కేసులో తప్పుడు కేసు నమోదు చేశారని దిల్లీ మంత్రి అతిశీ ఆరోపించారు. ‘‘దిల్లీ జలమండలి బోర్డు కేసు గురించి ఎవరికీ తెలియదు. మద్యం పాలసీ కేసులో కేజ్రీవాల్‌ను అరెస్టు చేయలేమని భావించిన కేంద్రం మరో తప్పుడు కేసుతో ఆయన్ను ఇబ్బంది పెట్టాలని చూస్తోంది. లోక్‌సభ ఎన్నికల్లో ఆయన్ను ప్రచారం చేయకుండా అడ్డుకునేందుకు భాజపా పన్నిన కుట్రలో భాగమే తాజా సమన్లు’’ అని విమర్శించారు.