నా అన్న ప్రాణం విలువ కేవలం $20 కాకూడదు...

విలపించిన అమెరికా మృతుడి సోదరుడు

వాషింగ్టన్‌: తన సోదరుడి ప్రాణం విలువ కేవలం 20 డాలర్లు కాకూడదని, ఇకనైనా జాత్యహంకారంతో కూడిన హింసను ఆపాలని... పోలీసుల దౌర్జన్యం వల్ల మరణించిన ఆఫ్రికన్‌-అమెరికన్‌ జార్జ్‌ ఫ్లాయిడ్‌ సోదరుడు ఫిలోనిస్‌ ఫ్లాయిడ్‌ విజ్ఞప్తి చేశారు. మే 25న ఓ దుకాణంలో సిగరెట్లు కొన్న జార్జ్‌, 20 డాలర్ల నోటు చెల్లించారు. అయితే ఆ నోటు నకిలీదనే అనుమానంతో దుకాణ యజమాని పోలీసులకు ఫిర్యాదు చేశారు. అక్కడకు చేరుకున్న మినియాపోలిస్‌ నగర పోలీసులు జార్జ్‌ను అదుపులోకి తీసుకున్నారు. వారిలో ఒకరు జార్జ్‌ మెడను సుమారు తొమ్మిది నిముషాల పాటు మోకాలితో అదమి పట్టడంతో ఆయన మరణించారు. ఈ ఘటనకు నిరసనగా అగ్రరాజ్యంలో పలుచోట్ల నిరసనలు వెల్లువెత్తిన సంగతి తెలిసిందే.

కాగా, జార్జ్‌ మృతికి దారితీసిన పోలీసు దౌర్జన్యం, జాత్యహంకారం వంటి అంశాలపై విచారణకు అమెరికా ప్రభుత్వం ప్రజా ప్రతినిధులతో ఓ కమిటీని ఏర్పాటు చేసింది. బుధవారం ప్రారంభమైన కమిటీ విచారణ సందర్భంగా జార్జి సోదరుడు ఫిలోనిస్‌ ఫ్లాయిడ్‌... ‘‘ఆరోజు మా సోదరుడు ఎవరినీ గాయపరచలేదు. కేవలం 20 డాలర్ల కోసం మా అన్న ప్రాణాలు పోయాయి. ఓ నల్ల జాతీయుడి ప్రాణం విలువ అంతేనా? జార్జ్‌ ప్రాణాల విలువ అంతకంటే ఎక్కువ. మా అందరి ప్రాణాలకు విలువ ఉంది. నల్లవారి ప్రాణాలకు విలువ ఉంది. నా సోదరుడు సహాయం కోసం అర్ధించినప్పుడు ఎవరూ స్పందించలేదు... ఇప్పుడు నేను, నా కుటుంబం, వీధుల్లో నిరసనలు తెలుపుతున్న ప్రజలు, ప్రపంచం మొత్తం అడుగుతున్నాము... దయచేసి స్పందించండి. ఇంతవరకు జరిగింది చాలు. ఇది 2020... ఇకనైనా దీనిని (జాత్యహంకారం) ఆపండి. ఈ హింసను ఆపండి. మా అన్న మరణం వృధాగా పోకుండా చూడటం మీమీదే ఆధారపడి ఉంది.’’ అని విలపించారు.