MSP: రైతన్నకు కేంద్రం గుడ్‌న్యూస్‌.. వరికి మద్దతు ధర పెంపు

దిల్లీ: అన్నదాతలకు కేంద్రం శుభవార్త చెప్పింది. 2022-23 ఖరీఫ్‌ సీజన్‌కు పలు రకాల పంటలపై కనీస మద్దతు ధర పెంపునకు కేంద్ర కేబినెట్‌ ఆమోదించింది. ఈ మేరకు బుధవారం జరిగిన కేబినెట్‌ సమావేశంలో నిర్ణయం తీసుకుంది. మొత్తం 14 పంటలకు మద్దతు ధరను పెంచేందుకు కేంద్రం అంగీకరించింది. ఆ వివరాలను కేంద్ర మంత్రి అనురాగ్‌ ఠాకూర్‌ మీడియాకు వెల్లడించారు.

* సాధారణ వరి క్వింటాల్‌ కనీస మద్దతు ధరను రూ.100 పెంచారు. దీంతో క్వింటాల్‌ ధర రూ.2,040కి చేరింది.

* నువ్వుల కనీస మద్దతు ధర క్వింటాల్‌పై రూ. 523 పెరిగింది.

* పెసర్లపై రూ.480 (క్వింటాల్‌కు) ఎంఎస్‌పీ పెంచారు.

* పొద్దుతిరుగుడు విత్తనాల కనీస మద్దతు ధర క్వింటాల్‌కు రూ.385 పెరిగింది.

* మినుములపై మద్దతు ధర క్వింటాల్‌కు రూ.300 పెంచారు.

* మధ్య రకం పత్తి కనీస మద్దతు ధర క్వింటాల్‌పై రూ.354 పెరిగింది.

* సోయాబీన్‌ మద్దతు ధరను క్వింటాల్‌పై రూ.350 పెంచారు.

* కందుల మద్దతు ధరను క్వింటాల్‌కు రూ.300 పెంచారు.

* హైబ్రీడ్‌ జొన్నల మద్దతు ధర క్వింటాల్‌పై రూ.232 పెరిగింది.

* సజ్జల కనీస మద్దతు ధర క్వింటాల్‌కు రూ.100 పెరిగింది.

* మొక్కజొన్న మద్దతు ధరను క్వింటాల్‌పై రూ.92 పెంచారు.