Gujarat: జూనియర్ క్లర్క్ క్వశ్చన్ పేపర్ హైదరాబాద్‌లో లీక్.. పరీక్ష వాయిదా

అహ్మదాబాద్‌: గుజరాత్‌ పంచాయతీరాజ్‌ శాఖలో జూనియర్‌ క్లర్క్‌ నియామకాల కోసం ఆదివారం జరగాల్సిన పోటీపరీక్ష వాయిదా పడింది. ప్రశ్నాపత్రం లీక్‌ కావడమే దీనికి కారణమని పంచాయతీ పరీక్ష బోర్డు ప్రకటించింది. దీనిపై కేసు నమోదు చేసిన పోలీసులు ఓ అనుమానితుణ్ని అరెస్టు చేసి విచారిస్తున్నారు.

మొత్తం 1,181 పోస్టులకుగానూ నియామక నోటిఫికేషన్‌ విడుదల చేసినట్లు పంచాయతీ బోర్డు తెలిపింది. 9.5 లక్షల మంది దరఖాస్తు చేసుకున్నట్లు వెల్లడించింది. రాష్ట్రవ్యాప్తంగా 2,995 పరీక్షా కేంద్రాలను ఏర్పాటు చేసినట్లు పేర్కొంది. విశ్వసనీయ సమాచారం మేరకు ఓ అనుమానితుణ్ని అదుపులోకి తీసుకొని విచారించగా.. అతని వద్ద ప్రశ్నపత్రం లభించినట్లు తెలిపింది. ఆ తర్వాతే పరీక్షను వాయిదా వేయాలని నిర్ణయించినట్లు తెలిపింది. త్వరలోనే ఈ పరీక్షను తిరిగి నిర్వహిస్తామని ప్రకటించింది.

ఈ ప్రశ్నాపత్రాన్ని హైదరాబాద్‌లోనే ముద్రించినట్లు సమాచారం. ఈ మేరకు సదరు ప్రింటింగ్‌ ప్రెస్‌పై కేసు కూడా నమోదు చేసినట్లు తెలుస్తోంది. ప్రశ్నాపత్రం లీక్‌పై ప్రతిపక్షాలు తీవ్ర విమర్శలు గుప్పిస్తున్నాయి. గత ఏడాది జరిగిన అసెంబ్లీ ఎన్నికల సమయంలో ప్రశ్నపత్రాల లీక్‌ ప్రధాన అంశంగా తెరమీదకు వచ్చింది. ఈ సమస్యను అరికట్టేందుకు కఠిన చట్టాన్ని తీసుకొస్తామని ఆమ్‌ ఆద్మీ పార్టీ కన్వీనర్‌ అరవింద్‌ కేజ్రీవాల్‌ హామీ కూడా ఇచ్చారు. తాజాగా ఆయన స్పందిస్తూ.. గుజరాత్‌లోనే ఇలా ఎందుకు జరుగుతుందో? అని ట్విటర్‌ వేదికగా సందేహం వ్యక్తం చేశారు.