Sikkim: విరిగిన కొండచరియలు.. చిక్కుకు పోయిన 550 మంది పర్యాటకులు!

గ్యాంగ్‌టక్‌: భారీ వర్షాల కారణంగా ఈశాన్య రాష్ట్రం సిక్కింలోని చుంగ్‌తాంగ్‌ మార్గంలో కొండచరియలు విరిగిపడ్డాయి. దీంతో రహదారి దెబ్బతినండంతో 150 వాహనాల్లో దాదాపు 550 మందికి పైగా పర్యాటకులు చుంగ్‌తాంగ్‌-లాచుంగ్‌ మార్గంలో దాదాపు 12గంటల పాటు చిక్కుకుపోయినట్టు భారత సైన్యం వెల్లడించింది. పర్యాటకులకు అవసరమైన ఆహారపదార్థాలు, అత్యవసర వైద్యం అందిస్తున్నట్లు తెలిపింది. కొండచరియలు విరిగిపడిన కారణంగా దెబ్బతిన్న రహదారిని బోర్డర్‌ రోడ్‌ ఆర్గనైజేషన్‌ పునరుద్ధరిస్తున్నట్లు పేర్కొంది. మరోవైపు, భారీ వర్షం, చలి కారణంగా పునరుద్ధరణ పనులకు ఆటంకం కలుగుతోందని, సిక్కిం ప్రభుత్వ యంత్రాంగం సహాయంతో పర్యాటకులను లాచుంగ్‌కు తరలించేందుకు ప్రయత్నిస్తున్నట్లు సైన్యం వెల్లడించింది. సిక్కిం వ్యాప్తంగా మూడు చోట్లు భారీ కొండచరియలు విరిగిపడినట్లు అధికారులు చెబుతున్నారు. దీంతో ఉత్తర సిక్కిం ప్రాంతానికి పర్యాటకులకు అనుమతిని తాత్కాలికంగా నిలిపివేసినట్లు తెలిపారు.