India Corona: 12 వేలకు దిగొచ్చిన క్రియాశీల కేసులు

మరోరోజు వెయ్యి దిగువనే కొత్త కేసులు

దిల్లీ: దేశంలో కరోనా వైరస్ పూర్తిస్థాయిలో అదుపులోకి వస్తోంది. ముందురోజు వెయ్యి లోపే నమోదైన కొత్త కేసులు.. తాజాగా 800 దిగువకు చేరాయి. 50కి పైగా మరణాలు సంభవించాయి. మంగళవారం కేంద్ర ఆరోగ్య శాఖ వెల్లడించిన గణాంకాల ప్రకారం..

సోమవారం 4 లక్షల మందికి నిర్ధారణ పరీక్షలు నిర్వహించగా..795 మందికి పాజిటివ్‌గా తేలింది. పాజిటివిటీ రేటు 0.17 శాతానికి చేరుకుంది. కేరళ మునుపటి గణాంకాలను సవరించడంతో మృతుల సంఖ్యలో పెరుగుదల కనిపించింది. 24 గంటల వ్యవధిలో 58 మరణాలు నమోదయ్యాయి. అందులో కేరళ వాటానే 56. ఇక నిన్న 1,280 మంది కోలుకున్నారు. క్రియాశీల కేసులు మరింత తగ్గి.. 12వేలకు దిగొచ్చాయి. 2020 ఏడాది ప్రారంభం నుంచి 4.30 కోట్ల కరోనా కేసులు రాగా.. అందులో రికవరీ రేటు 98.76 శాతానికి చేరి ఊరటనిస్తోంది. క్రియాశీల రేటు 0.03 శాతానికి క్షీణించింది. మరణాలు 1.21 శాతంగా ఉన్నాయి. ఇక నిన్న 16 లక్షలమంది టీకా తీసుకోగా.. 184 కోట్లకు పైగా డోసులు పంపిణీ అయ్యాయి.