India Corona: 15 వందలకు దిగొచ్చిన కొత్త కేసులు

దిల్లీ: దేశంలో కరోనా కొత్త కేసులు క్రమంగా తగ్గుతున్నాయి. తాజాగా 15 వందలకు దిగొచ్చి ఊరటనిస్తున్నాయి. క్రియాశీల కేసులు 16 వేలకు పడిపోయాయి. మంగళవారం కేంద్ర ఆరోగ్య శాఖ వెల్లడించిన గణాంకాల ప్రకారం.. 

సోమవారం 3.57 లక్షల మందికి వైద్య పరీక్షలు నిర్వహించగా.. 1,569 మందికి కరోనా పాజిటివ్‌గా తేలింది. ముందురోజు కంటే 600 మేర కేసులు తగ్గాయి. రోజువారీ పాజివిటీ రేటు 0.44 శాతానికి చేరింది. ఇటీవల కాలంలో రోజువారీ కేసులు మూడు వేల ఎగువకు చేరి ఆందోళన కలిగించాయి. నాలుగో వేవ్ గురించి వార్తలు వచ్చాయి. కానీ కొద్ది రోజులుగా కేసులు క్రమంగా తగ్గుతూ వస్తున్నాయి. ఇక 24 గంటల వ్యవధిలో 2,467 మంది కోలుకున్నారు. ఇప్పటివరకూ 4.31 కోట్ల మందికి కరోనా సోకగా..98.75 శాతం మంది వైరస్‌ను జయించారు. క్రియాశీల కేసులు 16,400కు తగ్గిపోగా.. ఆ రేటు 0.04 శాతంగా ఉంది. నిన్న 19 మంది ప్రాణాలు కోల్పోయారు. మొత్తం మరణాల సంఖ్య 5.24 లక్షలు దాటింది. తాజాగా 10.8 లక్షల మంది టీకా తీసుకోగా.. గతేడాది ప్రారంభం నుంచి 191 కోట్లకు పైగా డోసులు పంపిణీ అయ్యాయి.