Gujarat Tragedy: ఇంకా వందమంది ఆచూకీ తెలియలేదు..!

దిల్లీ: గుజరాత్‌లో మోర్బీ ప్రాంతంలో జరిగిన తీగల వంతెన ఘటన తీవ్ర దిగ్భ్రాంతికి గురిచేసింది. 130 మందికి పైగా మరణించారు. ఇంకా దాదాపు వందమంది గల్లంతు అయ్యుంటారని అధికారులు అనుమానిస్తున్నారు. వారి మృతదేహాలు బురద నీటిలో చిక్కుకుపోయి ఉంటాయని అనుమానిస్తున్నారు. ఇక ఈ రోజుకు సహాయక చర్యలు నిలిపివేశారు. రేపు ఉదయం తిరిగి వాటిని ప్రారంభించనున్నట్లు తెలిపారు. ఇదిలా ఉంటే ఫోరెన్సిక్ వర్గాలు ఘటనకు గల కారణాలు వెల్లడించాయి. కొత్త ప్రారంభించిన బ్రిడ్జ్‌పైకి భారీ సంఖ్యలో ప్రజలు రావడంతో ఈ ప్రమాదం జరిగిందని ప్రాథమికంగా వెల్లడించాయి. 

నలుగురి ఉద్యోగుల అరెస్టు..?

గుజరాత్‌కు చెందిన ఒరెవా గ్రూప్‌ ఈ వంతెన మరమ్మతులు చేపట్టింది. ఈ ఘటన నేపథ్యంలో ఆ సంస్థకు చెందిన నలుగురు ఉద్యోగులను అరెస్టు చేసినట్లు సమాచారం. సీఎఫ్‌ఎల్‌ బల్బులు, గోడ గడియారాలు, ఈ-బైక్‌లు తయారు చేసే కంపెనీగా పేరొందిన ఈ సంస్థకు నిర్మాణ రంగంలో అసలు అనుభవమే లేకపోవడం గమనార్హం. అలాంటి కంపెనీకి వందేళ్ల పురాతన బ్రిడ్జి మరమ్మతు, నిర్వహణకు సంబంధించిన కాంట్రాక్ట్‌ ఎలా దక్కిందన్నదానిపై ఇప్పుడు ప్రశ్నలు రేకెత్తుతున్నాయి. ‘ప్రజలు ఈ వంతెన పరిసరాలకు ఎలాంటి నష్టం కలిగించకుండా బాధ్యాతాయుతంగా వ్యవహరిస్తే.. ఇది 15 ఏళ్లపాటు మనగలదు’ అని వంతెన పున: ప్రారంభానికి కొద్దిరోజుల ముందు ఒరెవా గ్రూప్‌ ఎండీ జయ్‌సుఖ్‌భాయ్ పటేల్ ప్రకటించడం గమనార్హం..