Railway recruitment:రైలును తగులబెట్టిన అభ్యర్థులు.. ఇంతకీ వివాదం దేనికి?

పట్నా: రైల్వే రిక్రూట్‌మెంట్‌ బోర్డ్‌ (ఆర్​ఆర్​బీ) పరీక్షల్లో అక్రమాలపై బిహార్​లో జరుగుతున్న నిరసనలు హింసాత్మకంగా మారాయి. గయలో రైలు పట్టాలపై ఆందోళనలు చేపట్టిన ఉద్యోగార్థుల్లో కొందరు విధ్వంసానికి పాల్పడ్డారు. ఆగిఉన్న ఓ రైలును రాళ్లు, కర్రలతో ధ్వంసం చేసి ఆపై నిప్పంటించారు. ఇదిలా ఉంటే పరీక్షల్లో అవకతవకలపై అభ్యర్థుల ఆందోళనల దృష్ట్యా.. నాన్ టెక్నికల్ పాపులర్ కేటగిరీ (ఎన్‌టీపీసీ)తో పాటు లెవల్-1 పరీక్షలను నిలిపివేయాలని రైల్వే మంత్రిత్వ శాఖ నిర్ణయించింది. వివిధ రైల్వే రిక్రూట్‌మెంట్ బోర్డుల పరిధిలోని పరీక్షల్లో ఉత్తీర్ణులైన వారు, ఫెయిల్ అయినవారి ఫిర్యాదులను పరిశీలించేందుకు ఉన్నత స్థాయి కమిటీని కూడా ఏర్పాటు చేయనున్నట్లు ప్రకటించింది.

తాజా ఆందోళనలపై గయ ఎస్​ఎస్​పీ ఆదిత్య కుమార్ మాట్లాడారు. ప్రస్తుతం పరిస్థితి అదుపులోనే ఉందని వెల్లడించారు. రైలు తగలబెట్టిన కొందరిని తాము అదుపులోకి తీసుకున్నామన్నారు. ప్రభుత్వ ఆస్తులను ధ్వంసం చేయొద్దని అభ్యర్థులకు సూచించారు. ఈ వ్యవహారాన్ని పరిష్కరించేందుకు ప్రభుత్వం ఓ కమిటీ వేసిందని వెల్లడించారు.

ఆర్‌ఆర్‌బీ 2019లో సీబీటీ-1 పరీక్షను నిర్వహించిందని.. ఆ ఫలితాల్లో అవకతవకలు జరిగాయని అభ్యర్థులు ఆరోపిస్తున్నారు. అప్పటినుంచి సరైన రీతిలో ఉత్తీర్ణత జాబితాను ప్రకటించలేదని.. ఈలోపే సీబీటీ-2 పరీక్ష నిర్వహణకు సిద్ధమైందని ఆరోపిస్తున్నారు. తక్షణమే ఈ పరీక్షను రద్దు చేయాలని వారు డిమాండ్ చేస్తున్నారు.