RSS- Adani group: ‘అదానీపై ఉద్దేశపూర్వక దాడి’.. అదానీ గ్రూప్‌నకు ఆరెస్సెస్‌ మద్దతు

దిల్లీ: అదానీ గ్రూప్‌ (Adani group) వ్యాపారాలపై హిండెన్‌బర్గ్‌ రీసెర్చ్‌ ఇచ్చిన నివేదిక (Hindenburg report) కలకలం కొనసాగుతోంది. స్టాక్‌ మార్కెట్‌లో అదానీ గ్రూప్‌ షేర్లన్నీ దాదాపు పతనమయ్యాయి. మార్కెట్‌ ఒడుదొడుకుల నేపథ్యంలో ఎఫ్‌పీఓను సైతం అదానీ ఎంటర్‌ ప్రైజెస్‌ ఉపసంహరించుకుంది. మరోవైపు ఈ వ్యవహారం పార్లమెంట్‌నూ తాకింది. హిండెన్‌బర్గ్‌ ఇచ్చిన నివేదికపై దర్యాప్తు చేపట్టాల్సిందేనంటూ విపక్షాలు డిమాండ్‌ చేస్తున్నాయి. ఈ నేపథ్యంలో రాష్ట్రీయ స్వయం సేవక్‌ సంఘ్‌ (RSS) ఈ వ్యవహారంపై స్పందించింది. అదానీ గ్రూప్‌ మద్దతుగా నిలిచింది. అదానీ గ్రూప్‌పై హిండెన్‌బర్గ్‌ నివేదికను ఉద్దేశపూర్వక దాడిగా అభివర్ణించింది. ఈ మేరకు సంఘ్‌ అధికారిక వెబ్‌సైట్‌ ఆర్గనైజర్‌లో ఓ కథనం రాసింది.

షార్ట్‌సెల్లర్‌ హిండెన్‌బర్గ్‌ రీసెర్చి ఇచ్చిన నివేదికను అనుసరించి ఒక వర్గానికి చెందిన భారతీయులు అదానీకి వ్యతిరేకంగా ప్రతికూల ప్రచారం ప్రారంభించారని ఆర్గనైజర్‌ ఆరోపించింది. అదానీకి వ్యతిరేకంగా జరుగుతున్న ఈ ప్రచారంలో కొందరు వామపక్ష భావజాలంతో సంబంధం ఉన్న కొన్ని వెబ్‌సైట్లు, కొందరు వ్యక్తులు ఉన్నారని ఆరోపించింది. వాస్తవానికి హిండెన్‌బర్గ్‌ నివేదిక తర్వాత అదానీ గ్రూప్‌ విషయంలో జరుగుతున్న దాడి వాస్తవానికి జనవరి 25న ప్రారంభం కాలేదని.. దీనికి 2016-17లో ఆస్ట్రేలియాలోనే బీజాలు పడ్డాయని ఆరోపించింది.

ఆస్ట్రేలియాకు చెందిన బాబ్‌ బ్రౌన్‌ ఫౌండేషన్‌ అనే పర్యావరణ అనుకూల ఎన్జీఓకు చెందిన ఓ వెబ్‌సైట్‌ అదానీని దెబ్బతీసేందుకు ఉద్దేపూర్వకంగా కథనాలు ప్రచురిస్తోందని ఆర్గనైజర్‌ ఆరోపించింది. ఆస్ట్రేలియాలో అదానీ బొగ్గు గనుల ప్రాజెక్టుపై వ్యతిరేకతతో ప్రారంభమైన ఈ వెబ్‌సైట్‌.. అదానీకి సంబంధించిన ప్రతి ప్రాజెక్ట్‌ గురించీ ప్రచురిస్తుందని పేర్కొంది. అదానీ సంస్థ బ్రాండ్‌ ఇమేజ్‌ను దెబ్బతీయడమే దీని లక్ష్యమని ఆరోపించింది.