Karnataka: కర్ణాటకలో ఇక మోరల్‌ పోలీసింగ్‌పై పటిష్ఠ నిఘా!

బెంగళూరు: రాష్ట్రంలో మతపరంగా ఎలాంటి అవాంఛనీయ ఘటనలు జరగకుండా అడ్డుకునేందుకు ప్రత్యేక బృందాలను ఏర్పాటు చేయనున్నట్లు కర్ణాటక (Karnataka) హోంమంత్రి జీ. పరమేశ్వర తెలిపారు. రాష్ట్రంలోని అన్ని జిల్లాల ప్రధాన నగరాలతోపాటు, మంగళూరు (Mangaluru) ప్రాంతంలో మోరల్‌ పోలీసింగ్‌ (Moral Policing) జరుగుతోందని, దాన్ని నియంత్రించేందుకు రాష్ట్ర ప్రభుత్వం ప్రత్యేక బృందాలను ఏర్పాటు చేయనుందని ప్రకటించారు. 

‘‘ దక్షిణ కన్నడ ప్రాంతంతోపాటు మంగళూరు వంటి చోట్ల మోరల్‌ పోలీసింగ్ ఎక్కువగా జరుగుతోంది. ప్రజలు ఈ మోరల్ పోలీసింగ్‌తో విసిగిపోయారు. దీనివల్ల సామాన్య ప్రజలు తీవ్ర ఇబ్బందులు ఎదుర్కొంటున్నారు. కొందరు వ్యక్తులు ఉద్దేశపూర్వకంగానే ఇలాంటి చర్యలకు పాల్పడుతున్నారు. ఈ మోరల్‌ పోలీసింగ్ వ్యవస్థను నియంత్రించేందుకు చర్యలు చేపట్టాలని ప్రభుత్వం నిర్ణయించింది. ఇలాంటివి పునరావృతం కాకుండా, సామాన్య ప్రజలకు ఎలాంటి అసౌకర్యం కలగకుండా నియంత్రిస్తాం’’ అని మంత్రి పరమేశ్వర వెల్లడించారు. మోరల్‌ పోలిసింగ్‌ను నియంత్రించేందుకు పోలీస్‌ వ్యవస్థలోనే ప్రత్యేక బృందాలను ఏర్పాటు చేయనున్నట్లు మంత్రి తెలిపారు. మోరల్‌ పోలిసింగ్‌తోపాటు మతపరమైన కేసులకు సంబంధించిన విచారణను కూడా ఈ బృందాలే చేస్తాయని చెప్పారు. రాష్ట్రంలో మత సామరస్యాన్ని నెలకొల్పడమే కాంగ్రెస్‌ ప్రభుత్వ లక్ష్యమని మంత్రి వెల్లడించారు.