Kiren Rijiju: కేంద్ర న్యాయశాఖ మంత్రికి త్రుటిలో తప్పిన ప్రమాదం

దిల్లీ: కేంద్ర న్యాయశాఖ మంత్రి కిరణ్‌ రిజిజు (Kiren Rijiju)కి త్రుటిలో ప్రమాదం తప్పింది. జమ్ము కశ్మీర్‌ పర్యటనకు వెళ్తుండగా.. రంబన్‌ జిల్లా బనిహల్‌ ప్రాంతంలో ఆయన కారును ఓ ట్రక్కు బలంగా ఢీ కొట్టింది. అయితే, ఈ ఘటన నుంచి మంత్రి సురక్షితంగా బయటపడటంతో పోలీసులు, అధికారులు ఊపిరిపీల్చుకున్నారు. ఉదంపూర్‌ సమీపంలో లోడుతో వెళ్తున్న ట్రక్కు రిజిజు వాహనాన్ని ఢీ కొట్టినట్లు  అదనపు డీజీ ముకేశ్‌ సింగ్‌ తెలిపారు.

ప్రమాదం జరగ్గానే భద్రతా సిబ్బంది మెరుపువేగంతో మంత్రి కారువద్దకు చేరుకున్నారు. కారు డోర్లు తెరిచి మంత్రిని బయటకు తీశారు. ఓ న్యాయసేవా కార్యక్రమంలో పాల్గొనేందుకు జమ్ముకశ్మీర్‌ వెళ్లిన ఆయన.. ఉదంపూర్‌ వరకు కారులో ప్రయాణించారు.‘ ఈ అందమైన రహదారిని ఎవరైనా ఆస్వాదించవచ్చు’ అంటూ విశాలవంతమైన రహదారి చూపిస్తూ తీసిన వీడియోను ట్విటర్‌లో ఇవాళ ఉదయం పోస్టు చేశారు. అంతలోనే ఈ ప్రమాదం చోటు చేసుకోవడం గమనార్హం.