హెలికాఫ్టర్ దిగుతుంటే వచ్చిన గాలికి.. కళాశాల గోడ కూలింది..!

నడ్డా పర్యటనలో ఇబ్బందికర పరిస్థితి

బలియా: భాజపా జాతీయ అధ్యక్షుడు జేపీ నడ్డా యూపీలో నిర్వహించిన ఎన్నికల ప్రచారంలో ఊహించని పరిణామం సంభవించింది. ప్రచారంలో భాగంగా నడ్డా ప్రయాణిస్తోన్న హెలికాప్టర్‌ ఓ  పాఠశాల ప్రాంగణంలో దిగింది. అది దిగే క్రమంలో అక్కడ గాలులు బలంగా వీచాయి. ఆ సమయంలో దుమ్ము, ధూళి లేవడం సాధారణమే కానీ.. ఆ గాలులకు కళాశాల గోడ కూలడమే ముక్కున వేలేసుకునేలా చేస్తోంది. ఆ హెలికాఫ్టర్ దిగుతుండగా.. ప్రహరీ కూలిపోయింది. అయితే ఆ ఘటనలో ఎవరూ గాయపడలేదు. 

దీనికి సంబంధించిన దృశ్యాలు నెట్టింట్లో చక్కర్లు కొడుతున్నాయి. అవి చూసి నెటిజన్లు అవాక్కవుతున్నారు. యూపీలో విద్యా సదుపాయాల నాణ్యతను ప్రశ్నిస్తున్నారు.  ప్రస్తుతం యూపీలో నాలుగో విడత పోలింగ్ జరుగుతోంది.