Nagaland: అసలు కేంద్ర హోం శాఖ ఏం చేస్తున్నట్లు?: రాహుల్‌ గాంధీ

దిల్లీ: నాగాలాండ్‌లోని మోన్‌ జిల్లాలో శనివారం సాయంత్రం భద్రతాబలగాలు మిలిటెంట్లుగా భావించి పౌరులపై కాల్పులు జరిపిన ఘటనలో.. 13 మంది మృతి చెందగా, మరో 11 మందికి తీవ్ర గాయాలయిన విషయం తెలిసిందే. ఈ ఘటనపై కాంగ్రెస్‌ అగ్ర నేత రాహుల్‌ గాంధీ విచారం వ్యక్తం చేస్తూ.. కేంద్ర ప్రభుత్వంపై విమర్శలు చేశారు. హోం మంత్రిత్వ శాఖ ఏం చేస్తోందంటూ ప్రశ్నించారు. ఈ మేరకు ఆదివారం ఆయన ట్వీట్ చేశారు. ‘ఇది హృదయ విదారకం. దీనిపై కేంద్ర ప్రభుత్వం నిజమైన సమాధానం ఇవ్వాలి. స్వదేశంలోనే పౌరులు, భద్రతా సిబ్బంది సురక్షితంగా లేనప్పుడు అసలు హోం మంత్రిత్వ శాఖ ఏం చేస్తున్నట్లు’ అంటూ ప్రశ్నించారు.

ఈ ఘటనపై నాగాలాండ్‌ ముఖ్యమంత్రి నెయ్‌ప్యూ రియో ఇప్పటికే అత్యున్నత స్థాయి సిట్‌ దర్యాప్తునకు ఆదేశించిన విషయం తెలిసిందే. బాధిత కుటుంబాలకు న్యాయం చేస్తామని ఆయన పేర్కొన్నారు. ఆర్మీ 3 కోర్‌ సైతం దీనిపై అధికారిక ప్రకటన విడుదల చేసింది. పౌరుల ప్రాణాలు కోల్పోవడంపై తీవ్ర విచారం వ్యక్తం చేస్తూ.. ఈ ఘటనపై విచారణ చేపట్టి బాధ్యులను చట్ట ప్రకారం శిక్షిస్తామని పేర్కొంది. ఈ ఘటన అనంతర పరిణామాల్లో ఒక జవాను సైతం మృతి చెందినట్లు తెలిపింది.