‘మైఖేల్‌’గా సందీప్‌కిషన్‌

యువ కథానాయకుడు సందీప్‌కిషన్‌ పాన్‌ ఇండియా స్థాయి చిత్రంలో మెరవనున్నారు. ‘మైఖేల్‌’ పేరుతో తెరకెక్కనున్న ఆ సినిమాని శ్రీ వెంకటేశ్వర సినిమాస్‌, కరణ్‌ సి ప్రొడక్షన్స్‌ సంస్థలు సంయుక్తంగా రూపొందిస్తున్నాయి. విజయ్‌ సేతుపతి ముఖ్యభూమిక పోషిస్తున్నారు. రంజిత్‌ జెయకోడి దర్శకుడు. శుక్రవారం టైటిల్‌ పోస్టర్‌ని విడుదల చేస్తూ ఈ సినిమాని ప్రకటించింది చిత్రబృందం. టైటిల్‌ పోస్టర్‌లో పోలీస్‌ సంకెళ్లతో రక్తంతో తడిసిన చేతులు దర్శనమిస్తున్నాయి. ఆ  పోస్టర్‌ కథలోని గాఢతని తెలియజెప్పేలా ఉంది. ‘మైఖేల్‌’గా సందీప్‌కిషన్‌ కనిపించనున్నారు. తెలుగుతోపాటు తమిళం, కన్నడ, మలయాళం, హిందీ భాషల్లో ఈ చిత్రం రానుందని సినీ వర్గాలు తెలిపాయి. భరత్‌ చౌదరి, పూస్కూర్‌ రామ్మోహన్‌రావు నిర్మాతలు. నారాయణదాస్‌ కె.నారంగ్‌ సమర్పిస్తున్నారు.