Bollywood: కర్వాచౌత్‌.. భార్యకు బీఎండబ్ల్యూ గిఫ్ట్‌గా ఇచ్చిన నటుడు

ముంబయి‌: ప్రతి ఏడాదిలాగానే ఈ సంవత్సరం కూడా కర్వాచౌత్‌ వేడుకలను ఉత్తరాదివాసులు భక్తి శ్రద్ధలతో జరుపుకున్నారు. జీవిత భాగస్వామి సంక్షేమాన్ని కోరుతూ వివాహితలు ఈ వేడుకల్లో పాల్గొన్నారు. బాలీవుడ్‌కు చెందిన పలువురు సినీ సెలబ్రిటీలు సైతం ఈ పండుగను వేడుకగా జరుపుకున్నారు. భర్త, కుటుంబ శ్రేయస్సును కాంక్షిస్తూ ఉదయం నుంచి ఉపవాసం ఉండి పూజా కార్యక్రమాలు నిర్వహించారు. దీనికి సంబంధించిన కొన్ని ఫొటోలను శిల్పాశెట్టి, యామీ గౌతమి, నటుడు వరుణ్‌ధావన్‌, కపిల్‌ శర్మతోపాటు సెలబ్రిటీలు సోషల్‌మీడియా వేదికగా షేర్‌ చేశారు. మరోవైపు బాలీవుడ్‌ నటుడు గోవింద తన సతీమణి సునీతకు ఓ ఖరీదైన బహుమతిని అందించారు. కర్వాచౌత్‌ వేడుకల్లో భాగంగా ఖరీదైన బీఎండబ్ల్యూ కారును కొనుగోలు చేసి.. ఆమెకు గిఫ్ట్‌గా ఇచ్చారు. తన సతీమణి ఆనందం కోసమే ఈ గిఫ్ట్‌ ఇచ్చినట్లు ఆయన తెలిపారు.