Gam Gam Ganesha: అన్నయ్యతో కలిసి నటిస్తానేమో!

‘‘రెండు నెలల కిందట విడుదలైన మా ‘బేబి’ ప్రేక్షకుల్ని ఎంతగా భావోద్వేగానికి గురిచేసిందో... ‘గం గం గణేశా’ అంతగా వినోదాన్ని పంచుతుంది’’ అన్నారు ఆనంద్‌ దేవరకొండ. ఆయన కథానాయకుడిగా... ఉదయ్‌ శెట్టి దర్శకత్వంలో రూపొందుతున్న చిత్రమిది. కేదార్‌ సెలగంశెట్టి, వంశీ కారుమంచి సంయుక్తంగా నిర్మిస్తున్నారు. శుక్రవారం హైదరాబాద్‌లో టీజర్‌ విడుదల కార్యక్రమం జరిగింది. దర్శకులు శివ నిర్వాణ, అనుదీప్‌ కేవీ, కార్తీక్‌ దండు, వినోద్‌ ముఖ్య అతిథులుగా హాజరయ్యారు. ఆనంద్‌ దేవరకొండ మాట్లాడుతూ ‘‘క్రైమ్‌, యాక్షన్‌, ఫన్‌ మేళవింపుగా రూపొందిన సినిమా ఇది. కథ చెబుతున్నప్పుడే చాలా ఆస్వాదించా. థియేటర్‌లోనూ ప్రేక్షకులకు అదే అనుభూతిని పంచుతుంది. భయం, అత్యాశ, కుట్ర నేపథ్యం ఈ సినిమాకి కీలకం. నా గత చిత్రాలతో పోలిస్తే భిన్నమైన చిత్రమిది. ప్రతి దర్శకుడికీ ఓ విజన్‌ ఉంటుంది. దాన్ని నమ్మే నేను చేస్తా. ఇది ‘బేబి’ సినిమాని దాటేస్తుందా లేదా అనే లెక్కలు వేసుకోను. ఏ సినిమా ప్రత్యేకత దానికి ఉంటుంది. భవిష్యత్తులో అన్నయ్య విజయ్‌తో కలిసి నటిస్తానేమో’’ అన్నారు. చిత్ర దర్శకుడు ఉదయ్‌ శెట్టి మాట్లాడుతూ ‘‘వినాయక చవితి చుట్టూ తిరిగే కథ ఇది. పండగని అందరూ కలిసి సంబరంగా జరుపుకున్నట్టే ఉంటుందీ చిత్రం’’ అన్నారు. ఈ ఏడాది చివర్లో చిత్రాన్ని ప్రేక్షకుల ముందుకు తీసుకొస్తామన్నారు నిర్మాత వంశీ కారుమంచి.