Ananya Nagalla: పెళ్లి ఎప్పుడన్నది కాలమే నిర్ణయిస్తుంది.

హైదరాబాద్‌: ‘మల్లేశం’తో టాలీవుడ్‌లోకి ఎంట్రీ ఇచ్చిన తెలుగమ్మాయి అనన్య నాగళ్ల (Ananya Nagalla). పవన్‌ కళ్యాన్‌ నటించిన ‘వకీల్‌సాబ్‌’ చిత్రంతో మంచి గుర్తింపు తెచ్చుకున్నారు. హీరోయిన్‌గా, సహాయనటిగా చేస్తూ ప్రేక్షకులను అలరిస్తున్నారు అనన్య. త్వరలో ఆమె ‘తంత్ర’ సినిమాతో ప్రేక్షకుల ముందుకురానున్నారు. ఈ సినిమాలో ధనుష్‌ రఘుముద్రి, సలోని కీలక పాత్రలు పోషించారు. శ్రీనివాస్‌ గోపీశెట్టి దర్శకత్వం వహించారు. ఈ సినిమా మార్చి 15న విడుదల కానుంది. ప్రమోషన్స్‌లో భాగంగా ఆమె ఓ ఇంటర్వ్యూలో పాల్గొన్నారు.  

‘‘ఈ సినిమా కథని నమ్మి చేసింది. మొత్తం సినిమాను నడిపించే బలమున్న పాత్రకు నేను న్యాయం చేయగలను అని నాకు అనిపించింది. అందుకే ఈ చిత్రంలో భాగం అయ్యాను. ఈ సినిమా మంచి థ్రిల్లింగ్‌ ఎక్స్‌పీరియన్స్‌ ఇస్తుంది. ఇందులో అనన్యను సరికొత్తగా చూస్తారు. దీని తర్వాత వరుస సినిమాలు విడుదలకు సిద్ధంగా ఉన్నాయి. ప్రస్తుతానికి పెళ్లి చేసుకునే ఉద్దేశం లేదు. ప్రేమ పెళ్లా? తల్లిదండ్రులు సూచించిందా? అంటే అది కాలమే నిర్ణయిస్తుంది. ఈ జనరేషన్‌ వాళ్లకు ప్రేమ, పెళ్లి గురించి తెలీదు. ముఖ్యంగా పరిశ్రమలో ఇప్పుడున్న వారికి జీవితంపై సరైన అవగాహన లేదు. అందుకే పెళ్లి చేసుకున్నా ఇండస్ట్రీలో వారిని చేసుకోను’’ అని అనన్య తెలిపారు.