సేనాపతి రాక కోసం ఏర్పాట్లు

కమల్‌హాసన్‌ కథానాయకుడిగా నటిస్తున్న ‘ఇండియన్‌ 2’ సెట్స్‌పైకి వెళ్లడానికి చాలా అడ్డంకులు దాటింది. ఇప్పుడు మాత్రం చిత్రీకరణను పరుగులు పెట్టిస్తున్నారు దర్శకుడు శంకర్‌. ఓ పక్క రామ్‌చరణ్‌తో సినిమా తీస్తూనే ‘ఇండియన్‌ 2’నీ తెరకెక్కిస్తున్నారు. ఈ సినిమా కొత్త షెడ్యూల్‌ కోసం ఏర్పాట్లు జరుగుతున్నాయి. చెన్నై విమానాశ్రయంలో చిత్రీకరణకు ఏర్పాట్లు జరుగుతున్నాయి. సేనాపతి విదేశాల నుంచి తిరిగి భారత్‌కు వచ్చే సన్నివేశాలను తెరకెక్కించనున్నట్లు తెలుస్తోంది. డిసెంబరు 5 నుంచి షెడ్యూల్‌ మొదలుకానుంది. తొలి చిత్రాన్ని మించి విజయం సాధించేలా ఈ చిత్రాన్ని శంకర్‌ తీర్చిదిద్దుతున్నట్లు చిత్రవర్గాలు చెబుతున్నాయి. కాజల్‌, రకుల్‌ ప్రీత్‌ సింగ్‌, ప్రియ భవానీ శంకర్‌ తదితరులు కీలక పాత్రల్లో నటిస్తున్న ఈ చిత్రాన్ని వచ్చే ఏడాది అక్టోబరులో విడుదల చేసే అవకాశం ఉంది.