Sai Pallavi: బాలీవుడ్‌కి సాయి పల్లవి?

సాయిపల్లవి బాలీవుడ్‌ పరిచయంపై ఎన్నో ఏళ్లుగా ప్రచారం వినిపిస్తూనే ఉంది. కానీ, ఇంత వరకు ఏదీ కార్యరూపం దాల్చలేదు. ఆమె కూడా గతంలో పలు హిందీ కథలు విన్నానని.. ఏదీ తనని మెప్పించలేదని ఎన్నోసార్లు వెల్లడించింది. అయితే ఇప్పుడు సాయిపల్లవి హిందీలో ఓ సినిమాకి పచ్చజెండా ఊపినట్లు సమాచారం అందుతోంది. ఆమిర్‌ ఖాన్‌ తనయుడు జునైద్‌ ఖాన్‌ ఈ చిత్రంలో హీరోగా నటిస్తున్నారని తెలిసింది. సునీల్‌ పాండే దర్శకుడిగా వ్యవహరిస్తున్న ఈ సినిమా ఇటీవలే చిత్రీకరణ ప్రారంభించుకుంది. త్వరలో సాయిపల్లవి పేరును అధికారికంగా ప్రకటించనున్నారంటూ బాలీవుడ్‌ వర్గాల్లో వార్తలు వినిపిస్తున్నాయి. ఆమె ప్రస్తుతం తమిళంలో శివ కార్తికేయన్‌కు జోడీగా ఓ సినిమాలో నటిస్తోంది.