Kiara Advani: ‘సత్యప్రేమ్‌..’ జ్ఞాపకాలు ఎప్పటికీ పదిలం

ఉత్తరాదిలో అలరిస్తూనే దక్షిణాదిలో స్టార్‌ హీరోల చిత్రాల్లో ఆడిపాడుతున్న కథానాయిక కియారా అడ్వాణీ (Kiara Advani). ప్రస్తుతం రామ్‌చరణ్‌తో కలిసి ‘గేమ్‌ ఛేంజర్‌’లో, హిందీలో కార్తిక్‌ ఆర్యన్‌తో ‘సత్యప్రేమ్‌ కీ కథ’ (Satyaprem Ki Katha) చిత్రాల్లో నటిస్తోంది. గత ఏడాది కార్తిక్‌, కియారా కలయికలో వచ్చిన ‘భూల్‌ భులయ్యా 2’ మంచి విజయం సాధించడంతో ఈ కొత్త చిత్రంపైనా మంచి అంచనాలే ఉన్నాయి. ఈ సినిమాలో కియారా తనకు సంబంధించిన సన్నివేశాల చిత్రీకరణను ఇటీవలే పూర్తి చేసింది. ఈ సినిమా గురించి కియారా మాట్లాడుతూ ‘‘నా మనసుకి ఎంతో దగ్గరైన సినిమా ఇది. ఈ సినిమా ప్రయాణాన్ని ఎప్పటికీ మర్చిపోలేను. ఈ సినిమా నాకు ఎందరో కొత్త స్నేహితుల్ని ఇచ్చింది. వాళ్లంతా నాకు ఎంతో విలువైన వాళ్లు. వారి జ్ఞాపకాలు ఎప్పటికీ మనసులో పదిలంగా ఉంటాయి’’అని రాసింది. జాతీయ అవార్డు గ్రహీత సమీర్‌ విద్వాన్‌ దర్శకత్వం వహిస్తున్న ఈ సినిమాని సాజిద్‌ నడియాడ్‌ వాలా నిర్మిస్తున్నారు. జూన్‌ 29న సినిమా థియేటర్లలో విడుదల కానుంది.