Liger: ‘లైగర్‌’ వేట ఎప్పుడంటే?

విజయ్‌ దేవరకొండ - పూరి జగన్నాథ్‌ కలయికలో రూపొందిన పాన్‌ ఇండియా సినిమా ‘లైగర్‌’. ధర్మ ప్రొడక్షన్‌, పూరి కనెక్ట్స్‌ సంస్థలు సంయుక్తంగా నిర్మించాయి. అనన్య పాండే కథానాయిక. మైక్‌ టైసన్‌, రమ్యకృష్ణ కీలక పాత్రలు పోషించారు. ఈ చిత్రం ఆగస్ట్‌ 25న ప్రేక్షకుల ముందుకు రానుంది. ఈనెల 9న విజయ్‌ పుట్టినరోజు. ఈ సందర్భంగా ఈ సినిమా నుంచి ఓ ప్రచార చిత్రం విడుదల చేయనున్నారు. దీనికి సంబంధించి బుధవారం సామాజిక   మాధ్యమాల ద్వారా ఓ ప్రకటన విడుదల చేశారు. ‘‘ఈనెల 9న సాయంత్రం 4గంటలకు ‘లైగర్‌’ వేట ఆరంభం కానుంది’’ అంటూ ట్విటర్‌లో ఓ పోస్టర్‌ పంచుకున్నారు. మిక్స్డ్‌ మార్షల్‌ ఆర్ట్స్‌ కథాంశంతో రూపొందుతోన్న చిత్రమిది. ప్రస్తుతం నిర్మాణాంతర పనులు జరుగుతున్నాయి. దీనికి కూర్పు: జునైద్‌ సిద్దిఖీ, స్టంట్స్‌: కెచ్చా, ఛాయాగ్రహణం: విష్ణు శర్మ.