Hunt: మిట్ట మిట్ట సూత్తారే..

సుధీర్‌బాబు (Sudheer Babu) కథానాయకుడిగా... భవ్య క్రియేషన్స్‌ పతాకంపై తెరకెక్కుతున్న చిత్రం ‘హంట్‌’ (Hunt). మహేష్‌ (Mahesh) దర్శకత్వం వహిస్తున్నారు. వి.ఆనందప్రసాద్‌ నిర్మాత. శ్రీకాంత్‌, ‘ప్రేమిస్తే’ ఫేమ్‌ భరత్‌ ప్రధాన పాత్రధారులు. పాపతో పైలం... అంటూ సాగే ఈ సినిమాలోని ప్రత్యేక గీతాన్ని విడుదల చేశారు. జిబ్రాన్‌ స్వరపరిచిన ఈ గీతాన్ని, మంగ్లీ, నకాష్‌ అజీజ్‌ ఆలపించారు. కాసర్ల శ్యామ్‌ రచించారు. యశ్‌ నృత్య దర్శకత్వంలో తెరకెక్కిన ఈ పాటలో ‘సీటీగొట్టి సీటీగొట్టి మిట్ట మిట్ట సూత్తారే..’ అంటూ సుధీర్‌బాబు, అప్సరారాణి సందడి చేశారు. ‘‘సినిమాలో రెండు పాటలున్నాయి. ఈ రోజు విడుదలైన తొలి పాటకి మంచి స్పందన లభిస్తోంది. స్టైలిష్‌గా సాగే హై ఓల్టేజ్‌ యాక్షన్‌ థ్రిల్లర్‌ చిత్రమిది. సుధీర్‌, శ్రీకాంత్‌, భరత్‌ పోలీస్‌ అధికారుల పాత్రల్ని పోషించారు. ప్రస్తుతం నిర్మాణానంతర కార్యక్రమాలు జరుగుతున్నాయి. త్వరలోనే విడుదల తేదీని ప్రకటిస్తాం’’ అన్నారు నిర్మాత.