Dhanush to Vishal: ధనుష్‌ టు విశాల్.. స్టార్‌ హీరోలకు నిర్మాతల మండలి షాక్‌

చెన్నై: కోలీవుడ్‌ స్టార్‌ హీరోలకు తమిళనాడు చిత్ర నిర్మాతల మండలి షాక్‌ ఇచ్చింది. ధనుష్‌, విశాల్‌, అథర్వ, శింబులకు రెడ్‌ కార్డు జారీ చేయాలని నిర్ణయించింది. ఈ మేరకు బుధవారం సాయంత్రం జరిగిన సర్వసభ్య సమావేశంలో తమిళనాడు చిత్ర నిర్మాతల మండలి ఈ కీలక నిర్ణయం తీసుకుంది.

కాగా, నిర్మాత మైఖేల్‌ రాయప్పన్‌తో ఏర్పడిన వివాదాల నేపథ్యంలో శింబు(Simbu)కు రెడ్‌ కార్డు జారీ చేయనుంది. ఈ వివాదంపై ఇప్పటికే ఎన్నోసార్లు చర్చలు జరిపినా శింబు నుంచి ఎలాంటి మార్పు రాకపోవడంతోనే ఈ నిర్ణయం తీసుకున్నట్లు తెలిపింది. ప్రొడ్యూసర్‌ అసోసియేషన్‌కు అధ్యక్షుడిగా వ్యవహరించిన సమయంలో అసోసియేషన్‌ నిధులను విశాల్‌ (Vishal) దుర్వినియోగం చేశారని ఆరోపిస్తూ ఆయనకు రెడ్‌ కార్డు ఇవ్వనున్నారు. తెనందాల్‌ నిర్మాణ సంస్థలో ధనుష్‌ (Dhanush) ఓ చిత్రానికి అంగీకరించారని.. 80 శాతం షూట్‌ పూర్తయ్యాక.. చిత్రీకరణ విషయంలో ఆయన ఆసక్తి కనబరచలేదని.. దాని వల్ల నిర్మాతకు నష్టాలు ఏర్పడినట్లు మండలి తెలిపింది. ఈ కారణంతోనే ఆయనపై చర్యలు తీసుకుంటున్నట్లు పేర్కొంది. మదియలకన్‌ నిర్మాణ సంస్థతో అథర్వ (Atharva) ఓ చిత్రానికి ఓకే చేశారని.. కాకపోతే షూటింగ్‌ విషయంలో ఆయనకు ఏమాత్రం సహకరించడం లేదనే ఆరోపణలతో అథర్వకు రెడ్‌ కార్డు ఇవ్వనున్నట్లు చెప్పింది.