Siraj-Anand Mahindra: సిరాజ్‌కూ ఓ ఎస్‌యూవీ ఇవ్వండి..! నెటిజన్‌ రిక్వెస్ట్‌కు ఆనంద్ మహీంద్రా రిప్లై ఇదే..

ఇంటర్నెట్ డెస్క్‌: ఆసియా కప్‌ ఫైనల్‌లో (Asia Cup 2023) శ్రీలంకపై ఆరు వికెట్లతో విరుచుకుపడిన భారత పేసర్ సిరాజ్‌ పేరు మారుమోగిపోతోంది. అంతేకాకుండా, తనకు వచ్చిన ప్లేయర్‌ ఆఫ్ ది మ్యాచ్‌ రివార్డును కూడా కొలంబో గ్రౌండ్‌ సిబ్బందికి ఇస్తున్నట్లు ప్రకటించి అందరి దృష్టిని ఆకర్షించాడు. ఈ క్రమంలో ప్రముఖ పారిశ్రామికవేత్త ఆనంద్ మహీంద్రాకు నెటిజన్ల నుంచి ఓ విజ్ఞప్తి అందింది. ఆనంద్ మహీంద్రా సామాజిక మాధ్యమాల్లో చురుగ్గా ఉంటారనే విషయం తెలిసిందే. సిరాజ్‌ ప్రదర్శనపై ట్విటర్ వేదికగా (ప్రస్తుతం ఎక్స్‌) ఆనంద్‌ మహీంద్రా అభినందనలు కురిపించారు.

‘‘మన ప్రత్యర్థుల కోసం ఇంతకుముందెన్నడూ నా హృదయం బాధపడలేదు. కానీ, ఇప్పుడు వారిపై ఏదో అద్భుతమైన శక్తి ప్రయోగించినట్లుగా అనిపించింది. మహమ్మద్‌ సిరాజ్‌ నువ్వొక మార్వెల్‌ అవెంజర్‌వి’’ అని ఆనంద్ మహీంద్రా ట్వీట్ చేశారు. దానిని రీట్వీట్ చేస్తూ ఓ అభిమాని.. ‘‘సర్, సిరాజ్‌కు ఓ ఎస్‌యూవీ ఇవ్వండి’’ అని రిక్వెస్ట్‌ పెట్టాడు. గతంలోనే ఇచ్చినట్లు మహీంద్రా బదులిచ్చారు. 2021లోనే సిరాజ్‌కు ఓ ‘థార్‌’ను ఆనంద్ మహీంద్రా బహూకరించారు. ఆసీస్‌తో టెస్టు మ్యాచ్‌ గెలిచిన తర్వాత సిరాజ్‌కు ఆ కారును బహుమతిగా ఇచ్చారు. 

Mohammed Siraj: సి‘రాజసం’!

కొలంబో క్రికెట్ గ్రౌండ్ సిబ్బంది కోసం తన రివార్డును సిరాజ్‌ ప్రకటించడంపైనా ఆనంద్ మహీంద్రా స్పందించారు. ‘‘సిరాజ్‌ నిర్ణయంపై ఒకే ఒక్క మాట చెబుదామనుకుంటున్నా. అదేంటంటే ‘క్లాస్‌’. ఇదేమీ మీ సంపద లేదా మీ నేపథ్యం నుంచి వచ్చేది కాదు. మీలో ఉంటేనే అది బయటకు కనిపిస్తుంది’’ అని ట్వీట్ చేశారు.