సూర్య ‘ఫైర్‌’: ఇంగ్లాండ్‌ లక్ష్యం 186

ఆఖర్లో శ్రేయస్ మెరుపులు

అహ్మదాబాద్‌: నాలుగో టీ20లో టీమ్‌ఇండియా రెచ్చిపోయింది. సిరీస్‌లో తొలిసారి భారీ స్కోరు సాధించింది. 8 వికెట్లు నష్టపోయి ఇంగ్లాండ్‌కు 186 పరుగుల భారీ లక్ష్యం నిర్దేశించింది. సూర్యకుమార్‌ యాదవ్‌ (57; 31 బంతుల్లో 6×4, 3×6) భీకరమైన షాట్లతో ఆంగ్లేయులను వణికించాడు. అరంగేట్రం ఇన్నింగ్స్‌లోనే అర్ధశతకం అందుకున్నాడు. కేవలం 28 బంతుల్లోనే లాంఛనం పూర్తి చేసుకున్నాడు.

విధ్వంసకరంగా ఆడిన సూర్య రెండో వికెట్‌కు రాహుల్‌ (12)తో కలిసి 42, ఐదో వికెట్‌కు పంత్‌ (30; 23 బంతుల్లో 4×4)తో కలిసి 40 పరుగుల భాగస్వామ్యాలు నెలకొల్పాడు. వికెట్లు పడకుండా పంత్‌ కీలక ఇన్నింగ్స్‌ ఆడాడు. జోరు పెంచే క్రమంలో ఔటయ్యాడు. ఆఖర్లో శ్రేయస్‌ అయ్యర్‌ (37; 18 బంతుల్లో 5×4, 1×6) మెరుపులు మెరిపించాడు. జోఫ్రా ఆర్చర్‌ 4 వికెట్లు తీశాడు.