ధోని నా తండ్రి లాంటోడు..

చెన్నై: ధోని తనకు తండ్రి లాంటి వాడని ఐపీఎల్‌లో చెన్నై సూపర్‌కింగ్స్‌కు ఆడుతున్న శ్రీలంక ఫాస్ట్‌బౌలర్‌ పతిరన అన్నాడు. అతడి చిన్నచిన్న సలహాలు తనకెంతో ఆత్మవిశ్వాసాన్నిచ్చాయని చెప్పాడు. 2022లో ఐపీఎల్‌ అరంగేట్రం చేసిన 21 ఏళ్ల పతిరన.. ఆ తర్వాత చెన్నైకి కీలక బౌలర్‌గా ఎదిగాడు. ‘‘నా క్రికెట్‌ కెరీర్‌లో ధోని చాలా వరకు నా తండ్రి పాత్రను పోషిస్తున్నాడు. ఎప్పుడూ నన్నెంతో జాగ్రత్తగా చూసుకుంటాడు. ఇంట్లో మా నాన్న లాగే.. ధోని నాకు సలహాలిస్తుంటాడు. చిన్న చిన్న విషయాలు చెబుతాడు. కానీ అవే ఎంతో ఉపయోగపడతాయి. నాకెంతో ఆత్మవిశ్వాసాన్నిస్తాయి’’ అని చెప్పాడు.