MS Dhoni : అడ్రస్‌ అడిగిన ధోని.. నెట్టింట వీడియో వైరల్‌

ఇంటర్నెట్ డెస్క్‌:  టీమిండియా క్రికెటర్లలో మహేంద్రసింగ్‌ ధోనీ (Mahendra Singh Dhoni)కి ఉన్న క్రేజ్‌ వేరు. మైదానంలోనే కాదు. బయట కూడా విపరీతంగా ఆరాధించే అభిమానులు అతడికి ఉన్నారు. అంతమంది అభిమానులను సంపాదించుకోవడానికి అతడి ఆటతీరు మాత్రమే కాదు.. వ్యక్తిత్వం కూడా కారణం. ఇక ధోనీ బయట చాలా సింపుల్‌గా ఉంటాడు. ఇందుకు సంబంధించిన ఓ తాజా వీడియో నెట్టింట వైరలవుతోంది. అసలేం జరిగిందంటే..

ధోనీ తన స్నేహతుడితో కలిసి రాంచీ (Ranchi) వెళ్తూ ఓ వ్యక్తిని అడ్రస్‌ అడిగాడు. అతడి స్నేహితుడు వాహనం నడుపుతుండగా.. ముందు సీటులో కూర్చోన్న మహీ.. బైక్‌పై ఉన్నవారిని అడ్రస్‌ అడిగాడు. బైకర్‌ చెప్పినదానికి ధోనీ సందేహంగా ‘‘మీరు చెప్పేది రాంచీ వైపుగా వచ్చే సర్కిల్‌ గురించే కదా?’ అని అడిగాడు. దానికి ఆ యువకుడు అవునని చెప్పగా.. ‘‘రెండో విగ్రహం దగ్గర ఉన్న సర్కిల్‌ వద్ద టర్న్‌ తీసుకోవాలా ?’’ అని మళ్లీ ధోనీ అనడం ఆ వీడియోలో కనిపిస్తోంది. ఇక ఆ తర్వాత బైకర్స్‌కు సెల్ఫీ ఇచ్చి కరచాలనం చేసి అక్కడ్నుంచి ధోనీ వెళ్లిపోయాడు. దీనికి సంబందించిన వీడియోను ఆ అభిమాని సామాజిక మాధ్యమాల్లో పంచుకోవడంతో నెట్టింట చక్కర్లు కొడుతోంది. అభిమానులు ‘ధోని చాలా సింపుల్‌గా ఉండే వ్యక్తి. అతడి సింప్లిసిటీ వేరే సెలబ్రెటీలకు భిన్నంగా ఉంటుంది’ అని కామెంట్లు పెడుతున్నారు.