Twitter: దిగొచ్చిన ట్విటర్‌!

సమయమివ్వాలని కేంద్రానికి విజ్ఞప్తి
నిబంధనలు పాటిస్తామని వెల్లడి

దిల్లీ: కేంద్ర ప్రభుత్వ ఘాటైన నోటీసు పనిచేసినట్లుంది! అమెరికాకు చెందిన సామాజిక మాధ్యమ దిగ్గజ సంస్థ ట్విటర్‌ దిగొచ్చింది. భారత ప్రభుత్వ ఐటీ చట్టాలను పాటిస్తామని, వాటిని అమలు చేయడానికి కాస్త సమయం కావాలని ట్విటర్‌ కోరినట్లు తెలిసింది. ఈ మేరకు.. కేంద్ర ఐటీ మంత్రిత్వ శాఖకు లేఖ రాసినట్లు సమాచారం. కొత్త డిజిటల్‌ నిబంధనలను కొవిడ్‌-19 మహమ్మారి కారణంగా పూర్తిగా అమలు చేయలేకపోతున్నామని,  కాస్త సమయం ఇవ్వాలని ఆ లేఖలో విజ్ఞప్తి చేసినట్లు తెలిసింది. కొత్త నిబంధనలను పాటించకుంటే తీవ్రమైన చర్యలు తీసుకుంటామంటూ.. కేంద్ర ప్రభుత్వం కొద్దిరోజుల కిందటే ఘాటుగా నోటీసు జారీ చేసిన సంగతి తెలిసిందే. ఈ విషయమై ట్విటర్‌ ప్రతినిధిని సంప్రదించగా... ‘‘భారత్‌లో సేవలకు కట్టుబడి ఉన్నాం. కొత్త డిజిటల్‌ నిబంధనలను అమలు చేయడానికి కూడా సిద్ధమని ప్రభుత్వానికి మేం తెలియజేశాం. ఈ మేరకు మా ప్రతి చర్యను ప్రభుత్వానికి తెలియజేస్తున్నాం. భారత ప్రభుత్వంతో మా సంప్రదింపులు కొనసాగుతునే ఉంటాయి’’ అని పేర్కొన్నారు. కొత్త నిబంధనల ప్రకారం- వినియోగదారుల నుంచి వచ్చే ఫిర్యాదులను పరిష్కరించేందుకు భారత్‌లో ఓ అధికారిని ట్విటర్‌ నియమించాల్సి ఉంటుంది. దేశ సార్వభౌమత్వానికి ఇబ్బంది కలిగిస్తుందనిపించిన సందేశాలేమైనా ఉంటే వాటి మూలాల వివరాలను ప్రభుత్వం లేదా న్యాయస్థానం అడిగితే తెలియజేయాల్సి ఉంటుంది.