శిక్షణలో ‘ఫలాలు’.. నగరపాలిక ‘గుడ్డు’ మార్కులు

ఈనాడు, కరీంనగర్‌: బలవర్ధక ఆహారం తీసుకుంటేనే బాలలు ఆటపాటల్లో చురుగ్గా ఉంటారు.. ఆశించిన ఫలితాలు అందుకోగలుగుతారు.. ఇది గమనించే కరీంనగర్‌ నగరపాలిక చక్కని ఆలోచన చేసింది. అంబేడ్కర్‌ మైదానంలో నిర్వహిస్తున్న ఉచిత వేసవి శిక్షణ శిబిరానికి హాజరయ్యే వందలాది బాలబాలికల కోసం కార్పొరేషన్‌ అల్పాహారాన్ని సమకూరుస్తోంది. అందులో భాగంగా ఉదయం 6 నుంచి 8 గంటల వరకు శిక్షణ అనంతరం కోడిగుడ్డు, పాలు, అరటిపండ్లను వారికి అందజేస్తున్నారు.. వాటికోసం బారులు తీరిన బాలలనే మీరు చిత్రంలో చూస్తోంది. సుమారు 25 క్రీడాంశాల్లో విద్యార్థులకు ఇక్కడ శిక్షణ ఇస్తున్నారు. సుమారు 2500 మంది వివిధ క్రీడాంశాల్లో మెలకువలు నేర్చుకుంటున్నారు.