జిల్లాలకు ఆసరా కార్డులు

గ్రామాల వారీగా పంపిణీకి ఏర్పాట్లు

ఈనాడు, హైదరాబాద్‌: రాష్ట్రంలో కొత్తగా మంజూరైన 9.5 లక్షల ఆసరా పింఛన్ల తాలూకూ కార్డులు సిద్ధమయ్యాయి. జిల్లాలు, మండలాల వారీగా వాటిని బట్వాడా చేసే కసరత్తు ముమ్మరమైంది. పంపిణీలో లోటుపాట్లు లేకుండా చూసేలా, పింఛను మంజూరు పత్రాలు ఆన్‌లైన్లో డౌన్‌లోడ్‌ చేసి లబ్ధిదారులకు అందించేలా ప్రభుత్వం ఏర్పాట్లు పూర్తిచేసింది. స్వాతంత్య్ర వజ్రోత్సవాల సందర్భంగా రాష్ట్ర ప్రభుత్వం 57 ఏళ్లు దాటిన వృద్ధులతో పాటు వితంతువులు, ఒంటరి మహిళలు, గీత కార్మికులు ఇతర అసహాయ వర్గాలకు పింఛన్లు మంజూరు చేసింది. ఈ నెలాఖరులోగా పంచాయతీలు, పట్టణాల పరిధిలో వార్డుల వారీగా పింఛను ధ్రువీకరణ పత్రాలు, కార్డులు అందజేయాలనేది ప్రభుత్వ నిర్ణయం. స్థానిక ఎమ్మెల్యే లేదా మంత్రులు, ఇతర ప్రజాప్రతినిధుల వాటిని లబ్ధిదారులకు అందించనున్నారు. ఈ మేరకు గ్రామాల వారీగా పంపిణీ తేదీల రూపకల్పనపై ఎంపీడీవోలు కసరత్తు చేస్తున్నారు. ఆగస్టులో కొత్త పింఛన్లు మంజూరు చేసినందున సెప్టెంబరులో వీరందరి ఖాతాల్లో నగదు జమకానుంది.