తరగతి గదుల్లో మిర్చి ఆరబోత

న్యూస్‌టుడే, పలిమెల: జయశంకర్‌ భూపాలపల్లి జిల్లా పలిమెల మండలం పంకెన గ్రామంలో పాఠశాల యాజమాన్య కమిటీ ఛైర్మన్‌ మోతే కిష్టయ్య తన పొలంలో పండిన మిర్చిని ఆదివారం రాత్రి పాఠశాలకు తరలించి రెండు తరగతి గదుల్లో ఆరబోశారు. ఈ పాఠశాలలో 1 నుంచి 8 తరగతుల్లో 132 మంది విద్యార్థులు చదువుకుంటున్నారు. సోమవారం ఉదయం పాఠశాలకు వెళ్లిన విద్యార్థులు ఈ దృశ్యాన్ని చూసి విస్తుపోయారు. ఆ రెండు గదుల్లోని 3, 4 తరగతుల విద్యార్థులను.. ఉపాధ్యాయులు  1, 2 తరగతుల విద్యార్థులతో కలిపి కూర్చోబెట్టి పాఠాలు చెప్పారు. వర్షం నేపథ్యంలో వేరే దారిలేక మిర్చిని తరగతి గదిలో పోసినట్లు కిష్టయ్య తెలిపారు. తాను సెలవులో ఉన్నానని, వెంటనే మిర్చిని ఖాళీ చేయిస్తానని పాఠశాల ప్రధానోపాధ్యాయుడు వెంకటేశ్వర్లు చెప్పారు.