సరికొత్త క్షిపణిని ఆవిష్కరించిన ఇరాన్‌

టెహ్రాన్‌: ఇరాన్‌ గురువారం తన సరికొత్త బాలిస్టిక్‌ క్షిపణిని ఆవిష్కరించింది. ద్రవ ఇంధనంతో నడిచే ఖొర్రమ్‌షహర్‌ క్షిపణికి ఇది ఆధునిక వెర్షన్‌ అని పేర్కొంది. తన అణు కార్యక్రమంపై పశ్చిమ దేశాలతో ఉద్రిక్తతలు నెలకొన్న తరుణంలో ఇరాన్‌ చేపట్టిన తాజా చర్య ప్రాధాన్యాన్ని సంతరించుకొంది. ఖొర్రమ్‌షహర్‌-4 అనే ఈ క్షిపణిని టెహ్రాన్‌లో జరిగిన ఒక కార్యక్రమంలో అధికారులు విలేకరులకు ప్రదర్శించారు. చాలా స్వల్ప సమయంలోనే ఈ అస్త్రాన్ని ప్రయోగానికి సిద్ధం చేయవచ్చని రక్షణ మంత్రి జనరల్‌ మహ్మద్‌ రెజా అష్టియాని పేర్కొన్నారు. ఇది 2వేల కిలోమీటర్ల దూరం పయనించగలదని, 1500 కిలోల వార్‌హెడ్‌ను మోసుకెళ్లగలదని అధికారులు తెలిపారు. దీని ప్రయోగాత్మక పరీక్షకు సంబంధించిన వీడియోనూ వారు విడుదల చేశారు.