Israel - Hamas: ఆరు రోజుల్లో ఆరు వేల బాంబులు.. ఇజ్రాయెల్‌ పాస్ఫరస్‌ బాంబులు ప్రయోగిస్తోందని ఆరోపణలు!

టెల్‌ అవీవ్: హమాస్‌ మిలిటెంట్ల ఏరివేత లక్ష్యంగా గాజాపై ఇజ్రాయెల్ (Israel) బాంబుల వర్షం కురిపిస్తోంది. ఇప్పటి వరకు గాజాలోని 3,600 హమాస్‌ స్థావరాలపై దాడులు చేసినట్లు ఇజ్రాయెల్‌ వైమానిక దళం ఒక ప్రకటనలో పేర్కొంది. ఆరు రోజుల్లో నాలుగు వేల టన్నుల బరువున్న ఆరు వేల బాంబులను గాజాపై జారవిడిచినట్లు తెలిపింది. మరోవైపు యుద్ధంలో ఇజ్రాయెల్‌ వైట్‌ పాస్ఫరస్‌ బాంబులు ఉపయోగిస్తోందని న్యూయార్క్‌కు చెందిన హ్యుమన్‌ రైట్స్‌ వాచ్‌ అనే సంస్థ ఆరోపించింది. ఇవి పౌరులపై దీర్ఘకాలిక ప్రభావం చూపుతాయని ఆందోళన వ్యక్తం చేసింది. ఇజ్రాయెల్‌ సైన్యం మాత్రం గాజాలో వైట్ పాస్ఫరస్‌ బాంబులు ప్రయోగించలేదని తెలిపింది. 

అక్టోబరు 10న లెబనాన్‌పై, అక్టోబరు 11న గాజాపై ఇజ్రాయెల్‌ ప్రయోగించిన ఆయుధాలకు సంబంధించిన వీడియోలను పరిశీలించామని, వాటిలో వైట్ పాస్ఫరస్‌ ఆనవాళ్లు ఉన్నాయని హ్యుమన్‌ రైట్స్ వాచ్‌ తెలిపింది. గతంలో 2008-09లో గాజాపై ఉపయోగించిన వైట్‌ పాస్ఫరస్‌ బాంబులను పూర్తిగా నిర్వీర్యం చేస్తున్నామని 2013లో ఇజ్రాయెల్‌ ప్రకటించింది. తాజాగా మరోసారి ఇజ్రాయెల్‌ వీటిని గాజాపై ప్రయోగించిందని ఆరోపించడం చర్చనీయాంశంగా మారింది. 

ఇజ్రాయెల్‌ దాడుల్లోనే.. 13 మంది బందీలు మృతి: హమాస్‌

రష్యా - ఉక్రెయిన్‌ యుద్ధంలో తమ సైన్యంపై రష్యా వైట్‌ పాస్ఫరస్‌ బాంబులు ప్రయోగించిందని ఉక్రెయిన్‌ అధ్యక్షుడు జెలెన్‌స్కీ ఆరోపించారు. యుద్ధంలో ఇలాంటి బాంబులు భారీగా పొగను సృష్టిస్తూ.. కాంతిని వెదజల్లుతాయి . బంకర్‌లు, భవనాలను నాశనం చేసేందుకు పాస్ఫరస్‌ బాంబులను ఉపయోగిస్తారు. అయితే, ఇవి మనుషులపై తీవ్ర ప్రభావం చూపిస్తాయని, దీర్ఘ కాలిక రోగాలకు కారణమవుతాయని వైద్యరంగ నిపుణులు చెబుతున్నారు. అంతర్జాతీయ చట్టాల ప్రకారం వీటి వినియోగంపై ఎలాంటి నిషేధం లేకపోవడంతో కొన్ని దేశాలు శత్రువులపై దాడులు చేసేందుకు వినియోగిస్తున్నాయి.