‘కూరగాయతో పోటీలో లిజ్‌ ట్రస్‌ ఓటమి’.. ఈ వింత బెట్టింగ్‌ ఏంట్రా సామీ!

ఇంటర్నెట్‌ డెస్క్‌: ‘ఫలానా మ్యాచ్‌లో కోహ్లీ సెంచరీ చేస్తాడు.. నాదీ 100 రూపాయల బెట్‌’.. ‘ఆ ఎన్నికల్లో ఫలానా పార్టీ గెలవకపోతే నేను ఇకపై ఓటెయ్య!’.. సాధారణంగా బెట్టింగ్‌లంటే ఇలానే ఉంటాయి. కానీ, బ్రిటన్‌లో గడిచిన వారం రోజులుగా ఓ బెట్టింగ్‌ నడిచింది. హోరాహోరీ పోరులో ఆ దేశ ప్రధాని లిజ్‌ ట్రస్‌పై ఓ కూరగాయ గెలుపొందింది. కూ..ర..గా..య.. గెలుపొందిందా? వినడానికి ఆశ్చర్యంగా కదూ! అయితే ఆ పోటీ ఏంటో తెలుసుకోవాలి.

బ్రిటన్‌కు చెందిన డెయిలీ స్టార్‌ అనే పత్రిక వారం క్రితం ఓ పోటీ నిర్వహించింది. క్యాబేజీని పోలిన ఓ కూరగాయ (lettuce)ను ఒక పక్క.. బ్రిటన్‌ ప్రధాని లిజ్‌ ట్రస్‌ ఫొటోను ఒక పక్క పెట్టింది. ఈ కూరగాయ ముందుగా కుళ్లిపోతుందా? లిజ్‌ ట్రస్‌ పదవి ముందుగా పోతుందా? అనేది పోటీ! గడిచిన వారం రోజులుగా యూట్యూబ్‌లో ఈ లైవ్‌స్ట్రీమ్‌ నడుస్తూనే ఉంది.

లిజ్‌ ట్రస్ ఆర్థిక నిర్వహణపై సొంత పార్టీ సభ్యుల నుంచే తీవ్ర వ్యతిరేకత రావడంతో ఎట్టకేలకు లిజ్‌ట్రస్‌ తన పదవికి ఇవాళ రాజీనామా చేశారు. దీంతో ఆ డెయిలీ ‘మా lettuce గెలిచిందోచ్‌!’ అంటూ వెంటనే ట్వీట్‌ చేసింది. దీనిపై ప్రముఖ వ్యాపార వేత్త ఆనంద్‌ మహీంద్రా సైతం స్పందించారు. ఈ పోటీ గురించి వారం క్రితమే ట్వీట్‌ చేసిన ఆయన.. తాజాగా ఆ కూరగాయే విజయం సాధించిందంటూ ట్విటర్‌లో పేర్కొన్నారు. ఏదైమైనా నిన్నటి వరకు పదవికి రాజీనామా చేయబోనంటూ చెబుతూ వచ్చిన లిజ్‌ ట్రస్‌ పదవీ గండాన్ని వారం ముందుగా ఊహించిన ఆ పత్రిక కాన్ఫిడెన్సును మెచ్చుకోవాల్సిందే!