ఆలయానికి వెన్నెముక

ధర్మ సందేహం
ఆలయానికి వెన్నెముక

* దేవాలయాల్లో ధ్వజస్తంభం ఎందుకు ఏర్పాటు  చేస్తారు?

ఆలయ నిర్మాణంలో ధ్వజస్తంభ ప్రతిష్ఠాపన అత్యంత ప్రధానమైనది. ఆలయం సాధకుని దివ్యదేహానికి ప్రతీక. దేహమే దేవాలయం అన్నారు పెద్దలు. దేహానికి వెన్నెముక వంటిదే ఆలయానికి ధ్వజస్తంభం. ఆగమ సంప్రదాయం ప్రకారం దైవశక్తి ఐదు రూపాల్లో.. ఐదు చోట్ల ఉంటుంది. మూలవిరాట్టులో, ఉత్సవ మూర్తిలో, పాదుకలలో, అర్చకునిలో, ధ్వజస్తంభంలో దైవశక్తి ఉంటుంది. కనుక ఆలయంలో ధ్వజస్తంభం ఉండితీరాలి. దూరం నుంచి వచ్చే భక్తులకు ఆలయం ఎక్కడ ఉన్నదో సూచిస్తుందిది. అంతేకాదు, భక్తులు ఆలయానికి చేరేసరికి.. వేళదాటి ఆలయం ద్వారాలు మూసివేస్తే దిగులు పడనవసరం లేకుండా ధ్వజస్తంభ దర్శనంతో దైవదర్శనం పొందిన ఫలితం వస్తుంది. ఈ అంశాలన్నీ దృష్టిలో ఉంచుకొని మనపెద్దలు ఆలయాల్లో ధ్వజస్తంభం ఏర్పాటు చేశారు.