సూక్ష్మక్రిములతో ఊబకాయం!

మన పేగుల్లో బోలెడంత బ్యాక్టీరియా ఉంటుంది. ఇవి జీవక్రియల నియంత్రణకూ తోడ్పడతాయి. తిన్న ఆహారం జీర్ణం కావటం, పోషకాలను శరీరం గ్రహించుకోవటానికీ సాయం చేస్తాయి. ఇవి విడుదల చేసే ప్రొటీన్లు రక్తంలోకి చేరుకొని మనం ఎంత తినాలి? ఎప్పుడు తినాలి? ఏం తినాలి? అనీ నిర్దేశిస్తాయి. అంటే బరువు అదుపులోనూ పాలు పంచుకుంటాయన్నమాట. షికాగో యూనివర్సిటీ పరిశోధకులు ఇంకాస్త భిన్నంగానూ అధ్యయనం చేశారు. ఎక్కువ కొవ్వు ఆహారం తిన్న ఎలుకల్లోని బ్యాక్టీరియాను ఎలాంటి బ్యాక్టీరియా లేని సన్నటి ఎలుకలకు మార్పిడి చేసి పరిశీలించారు. ఈ సన్న ఎలుకలు ఆహారంలోని కొవ్వును విభిన్నంగా విడమరచుకుంటున్నట్టు, బరువు పెరుగుతున్నట్టు గుర్తించారు. సూక్ష్మక్రిములు జీవక్రియలను ఎలా నియంత్రిస్తాయన్నది ఇంకా కచ్చితంగా బయట పడలేదు. దీన్ని గుర్తించగలిగితే ఆహారంతో పెరిగే బరువును నివారించుకునే మార్గం దొరికినట్టే.