కుంగుబాటుకు మందుల తోడు

వయసు మీద పడినవారిలో కుంగుబాటు (డిప్రెషన్‌) తరచూ చూసేదే. అయితే అన్నిసార్లూ కుంగుబాటును తగ్గించే యాంటీడిప్రెసెంట్‌ మందులు పనిచేయకపోవచ్చు. రెండు మూడు మందులు వాడినా జబ్బు లక్షణాలు తగ్గకపోతే ఏం చేయాలో వైద్యులకూ పాలుపోదు. ఈ నేపథ్యంలో తాజా అధ్యయనం ఒకటి ఆశలు రేపుతోంది. అరిపిప్రజోల్‌, బుప్రోపియాన్‌ మందులను జతచేస్తే సమర్థంగా పనిచేస్తున్నట్టు బయటపడింది. చికిత్సకు లొంగని కుంగుబాటుతో బాధపడే వృద్ధులను మూడు బృందాలుగా విడదీసి ఈ అధ్యయనం నిర్వహించారు. ఒక బృందంలోని వారికి సిఫారసు చేసిన యాంటీడిప్రెసెంట్లతో పాటు అరిపిప్రజోల్‌ మందును జోడించారు. రెండో బృందానికి బుప్రోపియాన్‌ మందును జత చేశారు. మూడో బృందం వారికి డాక్టర్లు సూచించిన మందులను ఆపేసి బుప్రోప్రయాన్‌ ఒక్కటే వేసుకోమన్నారు. పది వారాల అనంతరం పరిశీలించగా ఒక్క బుప్రోపియాన్‌ వాడిన వారితో పోలిస్తే అరిపిప్రజోల్‌ వేసుకున్నవారిలో కుంగుబాటు లక్షణాలు గణనీయంగా తగ్గటం విశేషం. యాంటీడిప్రెసెంట్లకు అరిపిప్రజోల్‌, బుప్రోపియాన్‌ మందుల్లో ఏదో ఒకటి జోడించినా మంచి గుణం కనిపించటం గమనార్హం. అరిపిప్రజోల్‌ను జత చేసుకున్నవారిలో 29% మందిలో, బుప్రోపియాన్‌ జత చేసుకున్నవారిలోనూ 28% మందిలో కుంగుబాటు లక్షణాలు తక్కువగా కనిపించాయి. బుప్రోపియాన్‌ ఒక్కటే వేసుకున్న వారిలో 19% మందిలోనే లక్షణాలు తగ్గాయి.