Bacteria: మంచి బ్యాక్టీరియా పెరుగుతుంది!

పేగుల్లో బోలెడంత మంచి బ్యాక్టీరియా ఉంటుంది. ఇవి మనం తిన్న ఆహారం జీర్ణం కావటానికి, పోషకాలను గ్రహించుకోవటానికి తోడ్పడతాయి. ఫోలిక్‌ యాసిడ్‌, నియాసిన్‌, విటమిన్‌ బి6, విటమిన్‌ బి12 వంటి విటమిన్ల తయారీకీ సాయం చేస్తాయి. రోగనిరోధక శక్తినీ ఉత్తేజితం చేస్తాయి. అందుకే మంచి బ్యాక్టీరియాను కాపాడుకోవటం చాలా ముఖ్యం. యాంటీబయాటిక్‌ మందులతో విరేచనాలు పట్టుకున్నవారికి, పేగుపూత వంటి సమస్యలు గలవారికి డాక్టర్లు ప్రొబయాటిక్స్‌ వేసుకోవాలనీ సూచిస్తుంటారు. ఇవి మంచి బ్యాక్టీరియా వృద్ధికి తోడ్పడతాయి. అలర్జీలు, కుంగుబాటు (డిప్రెషన్‌) సమస్యలతో బాధపడేవారికీ మేలు చేస్తాయి. లాక్టోబాసిలస్‌ శక్తిమంతమైన ప్రొబయాటిక్‌. సహజంగా ఇది పెరుగులో ఉంటుంది. ఉదయం పరగడుపున 30 మి.లీ. పెరుగు తీసుకుంటే మంచి ప్రొబయాటిక్‌గా ఉపయోగపడుతుంది.