సంతానలేమికి ఇదీ కారణమే

మగవారిలో సంతానలేమికి రకరకాల అంశాలు దోహదం చేస్తుంటాయి. ఏసీటీఎల్‌7బి జన్యు మార్పు సైతం దీనికి కారణమవుతున్నట్టు యూనివర్సిటీ హాస్పిటల్‌ బాన్‌ పరిశోధకులు గుర్తించారు. వృషణాల్లో నిరంతరం వీర్యకణాలు పుట్టుకొస్తుంటాయి. ఈ ప్రక్రియలో భాగంగా గుండ్రటి బీజకణాలు పొడవైన వీర్యకణాలుగా మారతాయి. తల, మధ్యభాగం, ఈదటానికి తోడ్పడే పొడవైన తోక ఏర్పడతాయి. ఇలా ఆకారం మారటానికి కొన్ని ప్రోటీన్లు అవసరం. వీటిల్లో ఒకటే ఏసీటీఎల్‌7బి. ఇది వీర్యకణం పరిపక్వమయ్యే సమయంలో మనుషులు, ఎలుకల్లో ప్రత్యేకంగా తయారవుతుంది. అందుకే వీర్యకణాల ఆకారంలో కీలకపాత్ర పోషిస్తుందని భావిస్తున్నారు. దీన్ని గుర్తించటానికే జన్యు మార్పిడి చేసిన ఎలుకల మీద అధ్యయనం నిర్వహించారు. ఏసీటీఎల్‌7బి లేని ఎలుకల్లో వీర్యకణాల ఎదుగుదల ఆగినట్టు, బీజకణాలు గుండ్రంగానే ఉండిపోతున్నట్టు గుర్తించారు. మగవారిలో సంతానలేమికి ఏసీటీఎల్‌7బి జన్యు మార్పులు కారణమవుతున్నట్టు ఈ అధ్యయన ఫలితాలు సూచిస్తున్నాయి.