కొవిడ్‌ కొత్త వైరస్‌

కొవిడ్‌-19 అంతమైందని అనుకుంటే పొరపడ్డట్టే. తాజాగా కొత్తరకం కొవిడ్‌ వైరస్‌ పుట్టుకొచ్చింది. దీని పేరు జేఎన్‌.1. ఇది తీవ్ర ఇన్‌ఫెక్షన్‌కు కారణమవటమే కాదు, ప్రస్తుత టీకాలకు లొంగదు కూడా. అందుకే శాస్త్రవేత్తలు దీనిపై ఆందోళన చెందుతున్నారు. జేఎన్‌.1. వైరస్‌ రకాన్ని మూడు నెలల క్రితం లగ్జెంబర్గ్‌లో తొలిసారి గుర్తించారు. అనంతరం ఇంగ్లాండ్‌, ఐస్‌ల్యాండ్‌, ఫ్రాన్స్‌, అమెరికా దేశాలకు వ్యాపించింది. ఇది ఎక్స్‌బీబీ1.5, హెచ్‌వీ.1 వంటి కొవిడ్‌ వైరస్‌ రకాలకు చెందినదే అయినా దీనిలో చాలా తేడాలు ఉన్నాయి. ఎక్స్‌బీబీ1.5 రకం వైరస్‌ ముల్లు ప్రొటీన్‌ మీద 41 మార్పులు సంభవించి, ఈ స్థితికి చేరుకుందని వైద్య నివేదికలు చెబుతున్నాయి. అందువల్ల అందుబాటులో ఉన్న కొవిడ్‌ టీకాలు దీన్ని నిలువరించలేవని శాస్త్రవేత్తలు భయపడుతున్నారు. దీని నుంచి కాపాడుకోవటానికి ఆధునీకరించిన కొవిడ్‌ టీకాలు అవసరమని అమెరికాకు చెందిన సీడీసీ చెబుతోంది.